1. Auā ‘ou te mana‘o ‘ina ‘ia iloa e ‘outou o lo‘u finau matuā tele ‘ona o ‘outou ma i latou o i Laotikaia ‘atoa ma i latou o ē ‘ua lē iloa mai a‘u i le tino.
2. ‘Ina ‘ia fa‘amafanafanaina o latou loto, o fa‘aso‘oina i le alofa, ‘ina ‘ia maua ai le ‘oloa uma o le mautinoa i le loto matala, ‘ina ‘ia iloa lelei le mea lilo a le Atua o Keriso lea.
3. ‘Ua ‘iā te ia le ‘oloa uma o le poto ‘atoa ma le malamalama, ‘ua lilo ai.
4. O le ‘upu lea ‘ou te fai atu ai, ‘ina ne‘i fa‘asesēina ‘outou e se tasi i ‘upu fa‘a‘ole‘ole.
5. Auā e ui lava ‘ina ‘ou lē i ai ‘iā te ‘outou i le tino, ‘ae peita‘i ‘ou te i ai ‘iā te ‘outou i le agaga, o lo‘o ‘ou fiafia ma ‘ou va‘ai atu i lo ‘outou nofo lelei, ma le mausalī o lo ‘outou fa‘atuatua ‘iā Keriso.
6. O lenei, fa‘apei ‘ona ‘outou talia o le Ali‘i Keriso Iesu, ‘ia sāvavali ai ‘outou o ‘iā te ia.
7. ‘Ia maua‘a ‘outou ma ‘ia atiina a‘e ‘iā te ia, ‘ina ‘ia fa‘atumauina i le fa‘atuatua, fa‘apei ‘ona a‘oa‘oina o ‘outou, ‘ia fa‘atele i ai ma le fa‘afetai.
8. ‘Ia ‘outou, ne‘i fa‘apologaina ‘outou e se tasi i le poto lē aogā e fa‘asesē ai, e tusa ma le ‘uputu‘u a tagata, e tusa ma aitu o le lagi ma le lalolagi, ‘ae lē tusa ma Keriso.
9. Auā o lo‘o mau i totonu ‘iā te ia le tumu uma lava o le uiga Atua ‘ua i lona tino;
10. o lo‘o ‘ua fa‘a‘ato‘atoaina fo‘i ‘outou ‘iā te ia; o le ulu ia o ali‘i sili uma lava ‘atoa ma faipule.
11. ‘Ua fa‘aperitomeina fo‘i ‘outou ‘iā te ia i le peritomega e le‘i faia e lima, i le tō‘eseina o le tino fa‘aletino i le peritomega mai ‘iā Keriso.
12. Na tanumia ‘outou fa‘atasi ma ia i le papatisoga, o lea fo‘i ‘ua ‘outou toe tutū mai ai fa‘atasi ma ia i le fa‘atuatua i le mana o le Atua, o lē na fa‘atū mai ‘iā te ia i ē na oti.
13. O ‘outou fo‘i sa oti i amio leaga ma le lē peritomeina o ‘outou tino, na ia fa‘aola mai fa‘atasi ma ia, ‘ina ‘ua fa‘amāgaloina mai a tatou amioga leaga uma lava.
14. ‘Ina ‘ua sōloia le tusi o la tatou ‘aitalafu na nofo sala ai tatou i tulafono sa tete‘e mai ‘iā te i tatou, ‘ua ‘ave‘eseina ai fo‘i nai le vaeloto, ma fa‘amauina ai i fao i le satauro.
15. ‘Ua tu‘u‘eseina e ia o ali‘i sili ma faipule, ‘ona fa‘aalia mai lea o i latou ‘ia iloa uma, ‘ua manumālō o ia ‘iā te i latou i lea lava mea.
16. O lenei, ‘aua ne‘i fa‘amasino atu se tasi ‘iā te ‘outou i mea e ‘a‘ai ai, po o mea e inu ai, po o mea ia o tausamiga, po o masina fa‘ato‘ā va‘aia, po o sapati.
17. o ata lava ia o mea atalī, a o le tino, e a Keriso lava lea.
18. ‘Aua ne‘i ta‘ulēaogāina ‘outou e se tasi ‘ona ‘ua fa‘amamafaina e ia le fa‘alalolalo ma le ifo atu i agelu, o lo‘o fa‘alagolago i mea ‘ua ia va‘aia, o lo‘o fa‘afefetefuaina lona lava mafaufau fa‘aletino.
19. ‘Ua lē tāofi mau fo‘i i le Ulu, ‘ua tausia ai ma fa‘amalosia ai le tino uma, i mea e so‘o ai ‘atoa ma ua, o lo‘o tupu ai, ‘ina ‘ua fa‘atupuina mai e le Atua.
20. O lenei, ‘āfai ‘ua ‘outou oti fa‘atasi ma Keriso i aitu o le lagi ma le lalolagi, se a le mea tou te sāvavali peiseaī ‘ua nonofo pea ‘outou i le lalolagi? Se a fo‘i le mea tou te usiusita‘i atu ai i fa‘atonuga?
21. “‘Aua ne‘i pa‘i atu i ai, ‘Aua ne‘i tofo, ‘Aua ne‘i tago,”
22. o mea uma ia e uma ai pe a tagofia; e tusa ma poloa‘iga ma mea e a‘oa‘o atu e tagata?
23. O mea ia e tāua ai le poto, ‘ona o le fa‘afiaamioatua, ma le fa‘amaulalo, ma le fa‘asaunoa o le tino, ‘ae lē aogā ia mea e tāofiofi ai tu‘inanau o le tino.#