1. O lenei, ‘ia ‘outou tumau i le sa‘olotoga ‘ua fa‘asa‘oloto mai ai Keriso ‘iā te i tatou ‘ae ‘aua ne‘i toe tāofia ‘outou i le amo o le pologa.
2. Fa‘auta mai ‘ea, o a‘u o Paulo, ‘ou te fai atu ‘iā te ‘outou, ‘āfai e peritomeina ‘outou, e lē aogā lava Keriso ‘iā te ‘outou.
3. ‘Ou te toe molitino atu i tagata uma ‘ua peritomeina, ‘ua ‘iā te i latou ‘ona faia o mea uma lava o i le tulafono.
4. O ‘outou ‘ua fia maua le ta‘uamiotonuina i le tulafono, ‘ua tēte‘a ‘ese lava ‘outou ma Keriso, ‘ua pa‘u‘ū ‘outou nai le alofa tunoa.
5. Auā o le Agaga matou te fa‘atalitali atu ai i le fa‘amoemoe i le amiotonu ‘ona o le fa‘atuatua.
6. Auā e leai se aogā o le peritome po o le lē peritomeina i ē o ‘iā Keriso Iesu, tau lava o le fa‘atuatua e matuā galue i le alofa.
7. Sa ‘outou taufetuli lelei po o ai ‘ea ‘ua fa‘afelavei ‘iā te ‘outou, ‘ia ‘outou lē ‘ana‘ana i le ‘upu moni?
8. E lē mai lē na vala‘auina ‘outou lenei fa‘aoleole.
9. E fa‘afefeteina le paluga falaoa uma lava i sina mea itiiti e fa‘afefete a‘i.
10. ‘Ou te matuā fa‘atuatua ‘iā te ‘outou i le Ali‘i, tou te lē loto i se tasi mea; a o lē na te fa‘aatuatuvaleina ‘outou e tusa lava po o ai e fa‘asalaina o ia.
11. A o a‘u, le ‘au uso e, ‘āfai ‘ou te tala‘i atu pea i le peritome, se a ‘ea le mea e fa‘asauāina ai pea a‘u? ‘Āfai o lea, ‘ua fa‘aumatia i le mea e tausuai ai i le satauro.
12. O lo‘u mana‘o ‘ia tipi‘eseina i latou e i latou o ē fa‘agae‘etia ‘outou.
13. Auā le ‘au uso e, ‘ua vala‘auina ‘outou i le sa‘olotoga; tau lava ‘ina ne‘i ‘avea le sa‘olotoga ma avanoa mo le tino; a ‘ia ‘outou ‘au‘auna le tasi i le tasi i le alofa.
14. Auā ‘ua ‘ato‘atoa le tulafono uma lava i le ‘upu e tasi, o lenei, “‘Ia e alofa atu i lē lua te tuā‘oi, ‘ia pei o oe lava ‘iā te oe.”
15. ‘Ae ‘āfai tou te feūta‘i ma fe‘aina‘i, ‘ia ‘outou ‘ina ne‘i fa‘aumatia ‘outou ‘iā te ‘outou.
16. ‘Ou te fai atu, ‘ia ‘outou sāvavali i la le Agaga, ‘ona lē faia lea e ‘outou o le tu‘inanau o le tino.
17. Auā o le tino ‘ua tu‘inanau lea e tete‘e atu i le Agaga, ‘ua tu‘inanau fo‘i le Agaga e tete‘e atu i le tino; ‘ua fete‘ena‘i fo‘i ia mea o le mea lea tou te lē fai ai mea tou te loto i ai.
18. ‘Ae ‘āfai e ta‘ita‘iina ‘outou e le Agaga, ‘ua lē nonofo ‘outou i le tulafono.
19. ‘Ua iloa tino fo‘i galuega a le tino, o mea fa‘apenei; o le mulilua, o le faita‘aga, o le amio leaga, o le mataitu,
20. o le ifo i tupua, o le fai togafiti fa‘ataulāitu, o le feitaga‘i, o le femisa‘i, o le losilosi vale, o le lotoa, o le finau vale, o le fēvaevaea‘iga, o māseiga,
21. o le matau‘a, o le ‘onāga, o le ‘onā, o le poula, ma mea fa‘apenā; ‘ou te mua‘i ta‘u atu nei ‘iā te ‘outou, pei ‘ona ‘ou fai atu anamua, o ē faia mea fa‘apenā, e lē fai le mālō o le Atua mo latou tofi.
22. A o le fua o le Agaga, o le alofa, o le ‘oli‘oli, o le filemū, o le ‘onosa‘i, o le mataalofa, o le agalelei, o le fa‘amaoni,
23. o le agamalū, ma le amio mamā; e lē fa‘atulafonoina mea fa‘apenā.
24. A o ē o ‘iā Keriso, ‘ua fa‘asatauroina e i latou le tino, ma ‘ona mana‘o ma ona tu‘inanau.
25. ‘Āfai ‘ua tatou ola i le Agaga, ‘ia tatou sāvavali fo‘i i le Agaga.
26. ‘Aua ne‘i ‘avea i tatou ma ē mitamita vale, ‘aua ne‘i felu‘ia‘i, ‘aua ne‘i felosia‘i.#