33. ‘Ana lē mai le Atua lenā tagata, na te lē mafaia ‘ona fai se mea e tasi.”
34. ‘Ua latou tali atu, ‘ua fa‘apea atu ‘iā te ia, “‘Ua fānau mai oe ‘ua tumu i le agasala, ‘e te a‘oa‘o mai ‘ea ‘iā te i matou?” ‘Ona latou tulia lea o ia i tua.
35. ‘Ua fa‘afofoga Iesu na latou tulia o ia i tua; ‘ua ia silafia o ia, ‘ona fa‘apea atu lea ‘iā te ia, “Po ‘ua e fa‘atuatua i le Atali‘i o le tagata?”
36. ‘Ua tali mai o ia, ‘ua fa‘apea mai, “Le Ali‘i e, o ai ‘ea o ia, ‘ina ‘ia ‘ou fa‘atuatua ‘iā te ia?”
37. ‘Ua fetalai atu Iesu ‘iā te ia, “‘Ua e va‘ai ‘iā te ia, o ia fo‘i lenei ‘ua tautala ma oe.”
38. ‘Ona fa‘apea mai lea o ia, “Le Ali‘i e, ‘ua ‘ou fa‘atuatua lava;” ‘Ona ifo lea o ia ‘iā Iesu.