24. ‘Ona latou toe vala‘au lea i le tagata sa tauaso, ma fa‘apea atu ‘iā te ia, “Avatu ia le vi‘iga i le Atua; ‘ua matou iloa o le tagata agasala lenā.”
25. ‘Ona tali mai ai lea o ia, ‘ua fa‘apea mai, “‘Ou te lē iloa pe se tagata agasala o ia; o le mea e tasi ‘ua ‘ou iloa o a‘u le tauaso, ‘ua ‘ou va‘ai nei.”
26. ‘Ona toe fa‘apea atu lea o i latou ‘iā te ia, “Pe se a se mea na ia faia ‘iā te oe? Pe na fa‘apefea ‘ea ‘ona fa‘apupulaina e ia ou mata?”
27. ‘Ua tali mai o ia ‘iā te i latou, “‘Ua uma ‘ona ‘ou ta‘u atu ‘iā te ‘outou, ‘ae tou te le‘i fa‘alogo mai lava. Pe se a le mea tou te toe fia fa‘alogo mai ai? Tou te manana‘o ‘ea ‘ia fai ‘outou mōna so‘o?”
28. ‘Ona ‘upu leaga lea o i latou ‘iā te ia, ‘ua fa‘apea atu, “O oe lona so‘o; a o i matou nei, o so‘o o Mose i matou.
29. ‘Ua matou iloa, na fetalai mai le Atua ‘iā Mose; a o lenā tagata matou te lē iloa pe maifea ia.”
30. ‘Ua tali mai le tagata, ‘ua fa‘apea mai ‘iā te i latou, “O le mea e ofo ai lenei, ‘ina ‘ua lē iloa e ‘outou pe maifea o ia, a ‘ua fa‘apupula mai e ia o‘u mata.
31. ‘Ua tatou iloa e lē fa‘afofoga le Atua i ē agasala; ‘ae peita‘i a mata‘u se tasi i le Atua, ma fai lona finagalo, ‘ona fa‘afofoga mai lea o le Atua ‘iā te ia.
32. E le‘i fa‘alogo lava talu mai le vavau, ‘ona fa‘apupulaina e se tasi o mata o lē na fānau mai o tauaso.
33. ‘Ana lē mai le Atua lenā tagata, na te lē mafaia ‘ona fai se mea e tasi.”