34. ‘Ua ‘ou va‘aia fo‘i ma ‘ou molimau o ia lava le Alo o le Atua.”
35. O le taeao sa toetū ai Ioane ma nisi ona so‘o e to‘alua;
36. ‘ua ia va‘ai fo‘i ‘iā Iesu o sāvali ane, ‘ona fa‘apea atu lea o ia, “Fa‘auta i le Tama‘i mamoe a le Atua.”
37. ‘Ua fa‘alogologo fo‘i ona so‘o e to‘alua i lana ‘upu, ‘ona la mulimuli mai ai lea ‘iā Iesu.
38. ‘Ua fāliu Iesu, ‘ua silafia i lā‘ua ‘ua mulimuli mai, ‘ona fetalai atu lea o ia ‘iā te i lā‘ua, “Se a ‘ea la ‘oulua fe‘au?”‘Ua fai mai i lā‘ua ‘iā te ia, “Rapi e,” (O lona uiga pe a fa‘amatalaina, le a‘oa‘o e,) “O fea ‘e te nofo ai?”
39. ‘Ua fetalai atu o ia ‘iā te i lā‘ua, “Ō mai ia, ‘inā matamata.” ‘Ua la ō ane ma matamata atu i le mea ‘ua nofo ai o ia; ‘ona latou nonofo lea ma ia i lea aso, auā po ‘ua o‘o i le itūlā e fa i le afiafi.
40. O Aneterea, o le uso o Simona Peteru, o le tasi lea o i lā‘ua na fa‘alogologo ‘iā Ioane, ma mulimuli mai ‘iā Iesu.