1. O lenei, o‘u uso e, o ē ‘ou te alofa ma naunau i ai, o lo‘u fiafia ma lo‘u pale le ‘au pele, ‘ia fa‘apea ‘ona tumau o ‘outou i le Ali‘i.
2. ‘Ou te ‘ai‘oi atu ‘iā Evotia, ‘ou te ‘ai‘oi atu fo‘i ‘iā Sunetui, ‘ia tasi lo la manatu i le Ali‘i.
3. ‘Ou te fa‘atoga atu fo‘i ‘iā te oe, lo‘u fesoasoani fa‘amaoni, ‘ia e fesoasoani ‘iā te i lā‘ua, o ē na finau fa‘atasi ma a‘u i le tala lelei, ‘atoa ma Kelemene ma nisi uma ē na galulue fa‘atasi ma a‘u, ‘ua i le tusi o le ola o latou igoa.
4. ‘Ia ‘outou ‘oli‘oli i le Ali‘i e lē aunoa; ‘ou te toe fai atu, ‘ia ‘outou ‘oli‘oli.
5. ‘Ia iloa lo ‘outou agamalū e tagata uma lava; ‘ua lata mai le Ali‘i.
6. ‘Aua ne‘i popole ‘outou i se mea e tasi a ‘ia fa‘ailoa atu o ‘outou mana‘o i mea uma lava i le Atua, i le tatalo, ma le fa‘atoga, ‘atoa ma le fa‘afetai.
7. O le manuia fo‘i mai le Atua, o lo‘o silisili lava i mea uma e manatu i ai, e leoleoina ai o ‘outou loto ‘atoa ma o ‘outou mafaufau ‘iā Keriso Iesu.
8. Le ‘au uso e, o le toe ‘upu lenei; o mea uma ‘ua moni, o mea uma ‘ua ta‘uleleia, o mea uma ‘ua tonu, o mea uma ‘ua mamā, o mea uma ‘ua matagofie, ma mea uma ‘ua logoleleia, ‘āfai fo‘i o se isi amio lelei, po o se tasi mea e vi‘ia, ‘ia ‘outou mānatunatu i ia lava mea.
9. O mea fo‘i ‘ua a‘oa‘oina ai ‘outou, ma ‘outou talia, ma ‘outou fa‘alogo i ai, ma ‘outou va‘ai mai ‘iā te a‘u, ‘ia ‘outou faia ia lava mea; ‘ona ‘iā te ‘outou lea o le Atua e ona le manuia.
10. A ‘ua ‘ou fiafia tele i le Ali‘i, auā o ona po nei ‘ua toe tupu mai ai lo ‘outou mānatunatu mai ‘iā te a‘u sa ‘outou mānatunatu fo‘i i ai, a ‘ua lē maua e ‘outou se ala.
11. ‘Ou te lē fai atu ‘ona o le mativa, auā ‘ua a‘oa‘oina a‘u ‘ia to‘a filemū lo‘u loto i mea ‘ua ‘iā te a‘u.
12. ‘Ua ‘ou iloa le mativa, ‘ua ‘ou iloa fo‘i le mau‘oa, o i mea uma lava ‘ou te i ai, ma mea uma e o‘o ‘iā te a‘u ‘ua a‘oa‘oina ai a‘u ‘ia ‘ou mā‘ona, ma ‘ou fia ‘ai, ‘ia faula‘i mai mea, ma ‘ia oge mea.
13. ‘Ou te mafaia mea uma lava ‘ona o ia ‘ua fa‘amalosi mai ‘iā te a‘u.
14. ‘Ae ui lava i lea na ‘outou agalelei, ‘ina ‘ua ‘outou alolofa mai i lo‘u puapuagā.
15. ‘Ua ‘outou iloa fo‘i, ‘outou Filipi e, o le amataga o le tala lelei ‘ina ‘ua ‘ou alu atu nai Maketonia e leai se ekalesia na alofa mai ai ‘iā te a‘u i le matā‘upu o le foa‘i mai ma le talia o mea, na o ‘outou lava.
16. Auā fo‘i a o i Tesalonia a‘u, na ‘outou avatu mea na ‘ou mativa ai, ‘ua atu tasi ma le atu lua fo‘i.
17. E lē ‘ina ‘ua ‘ou sā‘ili se mea alofa, a ‘ou te sā‘ili le fua e atili ai ‘ona ta‘uleleia ai ‘outou.
18. A ‘ua ‘iā te a‘u mea uma, ‘ua tele lava, ‘ua ‘atoa mea ‘iā te a‘u, ‘ina ‘ua maua e a‘u mai ‘iā Epaferoti o mea mai ‘iā te ‘outou, o mea manogi lelei, o le taulaga e talia ma le mālie i le Atua.
19. A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu.
20. ‘Ia i le Atua lo tatou lava Tamā le vi‘iga e fa‘avavau fa‘avavau lava. Amene.
21. ‘Ua ‘ou alofa atu i le ‘au pa‘ia uma o ‘iā Keriso Iesu; o alolofa atu ‘iā te ‘outou le ‘au uso uma ‘ua ‘iā te a‘u.
22. E alolofa atu ‘iā te ‘outou le ‘au pa‘ia uma, ‘ae sili lava i latou o i le ‘āiga o Kaisara.
23. ‘Ia ‘iā te ‘outou uma lava le alofa tunoa o lo tatou Ali‘i o Iesu Keriso. Amene.