1. O le toe manatu lenei, o‘u uso e, ‘ia ‘outou ‘oli‘oli i le Ali‘i. ‘Ou te lē musu e toe tusi atu ni mea ‘ua uma ‘ona ‘ou tusia, a o le a saogalemū ai ‘outou.
2. ‘Ia ‘outou i ulī, ‘ia ‘outou i ē fai galuega leaga, ‘ia ‘outou i ē ‘ua tipi fua o latou tino.
3. Auā o le ‘au peritomeina moni i tatou, o ē ‘au‘auna i le Atua i le agaga ma mitamita ‘iā Keriso Iesu, ‘ae lē fa‘alagolago i la le tino,
4. ‘Ae lē fa‘apea ‘ua aunoa a‘u ma ni ala e tatau ai ‘ona ‘ou fa‘alagolago i le tino; auā ‘āfai e manatu se tasi e ‘iā te ia ni ala fa‘apea, e sili ‘ona tele ia mea ‘ua ‘iā te a‘u.
5. Na peritomeina i le po valu, o le ‘āiga o Isaraelu, o le itū‘āiga o Peniamina, o le Eperu o sa Eperū, o la le tulafono o le faresaio a‘u,
6. o lo‘u mā‘elegā na ‘ou fa‘asauā ai i le ekalesia; o la le amiotonu fo‘i i le tulafono, e le‘i mata‘uleagaina a‘u.
7. ‘Ae peita‘i o mea uma sa aogā ‘iā te a‘u, ‘ua ‘ou manatu na lē aogā ia mea ‘ona o Keriso.
8. O lenei fo‘i, e moni lava, o lo‘u manatu ‘ua lē aogā mea uma lava ‘ona o le silisili ‘ese o le poto i la Keriso Iesu lo‘u Ali‘i; ‘ona o ia ‘ua ‘ou fa‘alēaogāina ai mea uma ma o‘u manatu o otaota lava ia mea, ‘ina ‘ia ‘ou maua Keriso,
9. ‘ia maua fo‘i a‘u ‘ua ‘iā te ia, e le ‘iā te a‘u sa‘u amiotonu nai le tulafono, ‘ae peita‘i na o lea o lo‘o i le fa‘atuatua ‘iā Keriso, o le amiotonu lea mai le Atua i le fa‘atuatua.
10. ‘Ina ‘ia ‘ou iloa o ia ma le mana o lona toetū mai ma ‘ia fa‘atasi a‘u i ‘ona tigā, ‘ona ‘ua fa‘atusaina a‘u ‘iā te ia i lona maliu,
11. pe mafai lava ‘iā te a‘u ‘ona o‘o atu i le toetū mai o ē ‘ua oti.
12. E lē peiseaī ‘ua ‘ou maua nei, po ‘ua ‘ou ‘ato‘atoa ‘ona lelei nei, a ‘ou te tausisi atu pea pe mafai ‘ona ‘ou maua o le mea na maua ai a‘u e Keriso Iesu.
13. Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i.
14. ‘Ou te tausisi atu i le fa‘ailoga, ‘ia maua ai le taui na vala‘auina ai a‘u mai lugā e le Atua ‘iā Keriso Iesu.
15. O lenei, o i tatou uma o ē ‘ua fai ma tagata matua, ‘ia tatou mānatunatu fa‘apenā; ‘āfai fo‘i e ‘ese so ‘outou manatu i se isi itū, o le a ‘outou maua se fa‘aaliga mai le Atua e fa‘atatau i ai.
16. A ‘ia tatou amio e tusa ma le tulaga ‘ua tatou aulia.
17. Le ‘au uso e, ‘ia ‘outou fa‘aa‘oa‘o fa‘atasi mai ‘iā te a‘u, ‘ia ‘outou va‘ava‘ai fo‘i i ē o sāvavali fa‘apea, fa‘apei ‘ona fai o i matou ma fa‘aa‘oa‘o ‘iā te ‘outou.
18. Auā o lo‘o sāvavali isi e to‘atele, na ‘ou fai atu so‘o ai ‘iā te ‘outou, ‘ou te toe fai atu nei fo‘i ma le tagi, ‘ua latou fai mo latou fili le satauro o Keriso.
19. O le malaia, o lo latou i‘uga lea; o le manava, o lo latou atua lea; o le mea latou te vivi‘i ai, o le mea e māsiasi ai lea; e loto i latou i mea a le lalolagi.
20. A o lo tatou nu‘u moni ‘ua i le lagi lea, o lo‘o fa‘atalitali mai ai i tatou i le Fa‘aola, o le Ali‘i o Iesu Keriso.
21. Na te liua o tatou nei tino fa‘atauva‘a, ‘ia fa‘atatau i lona tino mamalu, e tusa ma le mana na te mafaia ai ‘ona fa‘ato‘ilaloina o mea uma ‘iā te ia lava.#