3. E leai fo‘i se toe fa‘afano e tasi; e i ai fo‘i le nofoāli‘i o le Atua ma le Tama‘i Mamoe, o ana ‘au‘auna fo‘i latou te ‘au‘auna ‘iā te ia.
4. Latou te va‘ava‘ai atu fo‘i i ona fofoga, e i ai fo‘i i o latou muaulu lona suafa.
5. E leai lava se pō i lea mea; e lē aogā fo‘i ‘iā te i latou se molī, po o le malamalama o le lā; auā o le Ali‘i le Atua na te fa‘amalamalamaina i latou; latou te fai ma tupu fo‘i e fa‘avavau fa‘avavau lava.
6. ‘Ona fai mai lea o ia ‘iā te a‘u, “O ‘upu e fa‘amaoni ia ma le moni; o le Ali‘i fo‘i le Atua o le ‘au perofeta pa‘ia ‘ua ‘auina mai e ia lana agelu e fa‘ailoa mai i ana ‘au‘auna mea e tusa ‘ona vave o‘o mai.”
7. “Fa‘auta, ‘ou te vave alu atu; ‘amu‘ia lē tausi i ‘upu o le valo‘aga o lenei tusi.”
8. O a‘u fo‘i o Ioane, na ‘ou va‘ai ma ‘ou fa‘alogo i nā mea; ‘ua ‘ou fa‘alogo ma ‘ou va‘ai ‘ona a‘u fa‘apa‘ū lea e ifo atu i vae o le agelu na na fa‘aali mai ‘iā te a‘u ia mea.
9. A ‘ua fai mai o ia ‘iā te a‘u, “‘Ia oe, ‘aua lava; auā o a‘u o lou uso a ‘au‘auna, ma o le ‘au perofeta ou uso, o le latou fo‘i o ē tausi i ‘upu o lenei tusi; ‘ia e ifo i le Atua.”
10. ‘Ua fai mai fo‘i o ia ‘iā te a‘u, “‘Aua ‘e te fa‘amaufa‘ailogaina ‘upu o le valo‘aga o lenei tusi; auā ‘ua latalata ona aso.
11. O lē amioletonu ‘ia amioletonu pea o ia, o lē ‘ele‘elea ‘ia ‘ele‘elea pea o ia, o lē amiotonu ‘ia amiotonu pea o ia, o lē pa‘ia ‘ia pa‘ia pea o ia.”
12. “Fa‘auta fo‘i, ‘ou te vave alu atu; ‘ua ‘iā te a‘u fo‘i le taui ‘ou te taui ta‘itasi atu ‘ia tusa ma lana amio ‘ua fai.
13. O a‘u le Alefa ma le Omeka, o le amataga ma le gata‘aga, o le muamua ma le mulimuli.”
14. ‘Amu‘ia i latou o ē ta o latou ‘ofu, ‘ina ‘ia taga ‘iā i latou le la‘au o le ola, ma ‘ia latou ulu atu i le ‘a‘ai i ona faitoto‘a.
15. A ‘ua i tuāpā o ulī, ma ē fa‘ataulāitu, ma ē faita‘aga, ma ē fasioti tagata, ma ē ifo i tupua, ‘atoa uma lava ē ‘ua loto i le tala pepelo ma latou faia.
16. “O a‘u o Iesu na ‘ou ‘auina atu la‘u agelu e molimau ‘iā te ‘outou i ia mea i ekalesia. O a‘u o le A‘a ma le fānau a Tavita, o le fetū ao pupula.”
17. ‘Ua fetalai mai le Agaga ma le fa‘ato‘ānofotane, “‘Inā sau ia.”‘Inā fai atu fo‘i ia o lē fa‘alogo, “‘Inā sau ia.”O lē fia inu, ‘inā sau ia, ‘atoa ma lē mana‘o i ai, ‘inā ‘ave fua ia le vai o le ola.
18. Auā ‘ou te ta‘utino atu ‘iā i latou uma o ē fa‘alogo i ‘upu o le valo‘aga o lenei tusi, ‘Ai se tasi e fa‘aopoopo mai se ‘upu i nei ‘upu, e fa‘aopoopoina atu e le Atua ‘iā te ia o mala ‘ua tusia i lenei tusi.
19. ‘Ai se tasi fo‘i e ‘ave ‘ese se ‘upu i ‘upu o le tusi o lenei valo‘aga, e ‘ave‘eseina e le Atua lona tofi i le la‘au o le ola, ma le ‘a‘ai pa‘ia, o mea ia ‘ua fa‘amatalaina i lenei tusi.