1. “‘Ia e tusi i le agelu a le ekalesia o i Efeso: O mea nei ‘ua fai mai ai lē u‘u i fetū e fitu i lona lima taumatau, o lē savali i totonu o tu‘ugāmolī auro e fitu.
2. “‘Ua ‘ou iloa au galuega, ma lou tigā, ma lou ‘onosa‘i, ‘ina ‘ua e lē lavātia i ē ‘ua leaga; ‘ua e tofotofo fo‘i i ē ‘ua fai mai o ‘aposetolo i latou, ‘ae leai lava, ‘ua e iloa fo‘i o tagata pepelo i latou.
3. Ma ‘ua e lavātia, ‘ua ‘iā te oe fo‘i le ‘onosa‘i, ‘ua e tautigā ‘ona o lo‘u igoa, ‘e te le‘i fa‘avaivai lava.