1. ‘Ua iloa fo‘i le fa‘ailoga tele i le lagi, o le fafine ‘ua ‘ofu i le lā, o i lalo o ona vae le masina, o i lona ulu fo‘i le paleali‘i fetū e sefulu ma le lua.
2. ‘Ua tō fo‘i o ia; ‘ua fa‘atigā ma ‘alaga i le tigā a fānau.
3. ‘Ua iloa fo‘i le tasi fa‘ailoga i le lagi, fa‘auta fo‘i, o le tarako tele e mūmū, e fitu ona ulu ma ona nifo e sefulu; ‘ua i ona ulu o paleali‘i e fitu.
4. ‘Ua toso e lona i‘u i lona tolu o vaega o fetū i le lagi, ma lafo ifo ‘iā i latou i le lalolagi. ‘Ua tu fo‘i le tarako i luma o le fafine o le a fānau, ‘ina ‘ia ‘ai e ia o lana tama pe a fānau.
5. ‘Ua fānau fo‘i e ia o le tama tane, o lē na te pule i nu‘u uma i le to‘oto‘o u‘amea; ‘ona segia a‘e lea o lana tama i le Atua i lona nofoāli‘i.
6. ‘Ona sola lea o le fafine i le vao, o i ai le mea ‘ua saunia e le Atua e nofo ai o ia, ‘ina ‘ia fafagaina ai o ia i aso e tasi le afe ma le lua o selau ma le onogafulu.
7. ‘Ua tau fo‘i le tau‘a i le lagi; o Mikaele ma ana agelu ‘ua latou tau ma le tarako, ‘ua ‘au fo‘i le tarako ma ana agelu e tau ai le ta‘ua,
8. a ‘ua latou lē manumālō, e lē toe maua fo‘i i le lagi se mea latou te nonofo ai.
9. ‘Ua lafo fo‘i le tarako tele, o le gata tuai lea, ‘ua igoa i le tiapolo, i le ma Satani, o lē fa‘asesē i le lalolagi uma; ‘ua lafo ifo i le lalolagi, ‘ua lafo fo‘i ana agelu fa‘atasi ma ia.
10. Na ‘ou fa‘alogo fo‘i i le leo tele i le lagi, ‘ua fa‘apea, “O ona pō nei ‘ua o‘o mai ai le fa‘aolataga, ma le mana, ma le mālō o lo tatou Atua, ma le pule a lona Keriso; auā ‘ua lafo i lalo lē na molia o tatou uso, o lē na molia i latou i luma o lo tatou Atua i le ao ma le pō.
11. A ‘ua latou manumālō ‘iā te ia ‘ona o le toto o le Tama‘i Mamoe, ma le ‘upu a la latou mau, ‘ua latou lē fa‘apelepeleina fo‘i lo latou ola ‘ua o‘o i le oti.
12. O le mea lea ‘ia ‘outou ‘oli‘oli ai, le lagi e ‘atoa ma ē ‘ua nonofo ai. ‘Oi talofa ‘iā te ‘oulua le fanua ma le sami, auā ‘ua alu ifo ‘iā te ‘oulua le tiapolo ‘ua lotoa tele, auā ‘ua na iloa ‘ua sa‘asa‘a ona pō.”