7. A o le potu i tua, e ta‘itasi i tausaga ma fo‘i fa‘atasi i ai na o le ositaulaga sili, e lē aunoa ma le toto, sa ositaulaga ai o ia mo ia lava, ‘atoa fo‘i ma sesē o le nu‘u;
8. ‘Ua fa‘ailoa mai ai e le Agaga Pa‘ia, e le‘i fa‘aalia le ala i le mea e sili ‘ona pa‘ia, ‘ina o tu pea le mua‘i fale fetāfa‘i.
9. O le fa‘atusa lea e o‘o mai i nei ona po, o lo‘o avatu ai mea alofa ma taulaga, e lē mafaia ‘ona fa‘a‘ato‘atoaina i la lona loto fuatia ifo o lē ‘au‘auna i ai.
10. O i ai na o mea e ‘ai, ma mea e inu, ma fuluga ‘ese‘ese i le vai, ma fa‘atonuga fa‘aletino, na fa‘atūina se‘ia o‘o i ona po o le toe fuata‘iga.
11. A o Keriso ‘ua maliu mai, o le ositaulaga sili i mea lelei ‘ua aulia, ‘ua ui ane i le fale fetāfa‘i e sili ‘ona lelei ma ‘ona ‘ato‘atoa, e lē faia e lima, o lona uiga e lē faia fa‘alelalolagi nei.
12. ‘Ona ulu fa‘atasi lava lea o ia i totonu o le mea pa‘ia, e lē ma le toto o ‘oti ma tama‘i povi, a o lona lava toto, ‘ua na maua le togiola fa‘avavau mo i tatou.
13. Auā ‘āfai o le toto o povi po‘a, ma ‘oti, ma le lefulefu o le povi fafine ta‘anoa, ‘ua sausau atu ai i ē ‘ua leaga, e fa‘apa‘iaina ai e o‘o i le fa‘amamāina o le tino.
14. E lē sili ‘ea ‘ona fa‘amamāina o ‘outou loto fuatia ifo a‘i galuega e oti ai, i le toto o Keriso, o lē na avatua o ia e ia i le Agaga fa‘avavau e fai ma taulaga e lē ponā i le Atua, ‘ina ‘ia ‘outou ‘au‘auna i le Atua soifua?
15. O le mea fo‘i lea, o lo‘o fai ai o ia ma puluvaga o le feagaiga fou, ‘ona o lona maliu fo‘i e togiola a‘i agasala na faia a o i le mua‘i feagaiga, ‘ia maua ai e i latou ‘ua vala‘auina o le tofi fa‘avavau na folafolaina.
16. Auā pe a fai se mavaega, se‘i ‘iloga e oti lē ana le mavaega, ‘ona o‘o ai lea;
17. auā e fa‘amaonia se mavaega ‘ona o le oti, ‘ina ‘ua lē aogā a o ola mai lē ana le mavaega.