21. O le fale fetāfa‘i fo‘i ‘atoa ma mea uma e ‘au‘auna a‘i na ia sausauina atu ai fa‘apea i le toto.
22. Na toe ‘inā uma fo‘i o mea uma ‘ona fa‘amamāina i le toto e tusa ma le tulafono; a lē o i ai fo‘i se fa‘amaligiina o le toto, ‘ua leai fo‘i se fa‘amāgaloina.
23. O le mea lea sa tatau ai ‘ona fa‘amamāina o fa‘atusa o mea o i le lagi i ia mea; a o mea fa‘alelagi lava e fa‘amamāina i taulaga e sili ‘ona lelei i ia mea.
24. Auā ‘ua lē ulu atu Keriso i le mea pa‘ia ‘ua faia e lima, o le fa‘atusa lea o le mea moni, a o le lagi lava, ‘ina ‘ia iloa ai nei o ia i luma o le Atua mo i tatou.
25. ‘Ae lē ‘ina ‘ia avatu so‘o o ia e ia ma taulaga, pei o le ositaulaga sili ‘ona ulu atu i le mea pa‘ia i lea tausaga ma lea tausaga ma le toto ‘ese;
26. auā ‘ana fa‘apea po ‘ua tatau ‘ona tigāina fa‘alasi o ia talu ona fa‘avaeina o le lalolagi a o lenei, ‘ua tasi lava le fa‘aalia mai o ia i le fa‘a‘atoaga o tausaga, ‘ina ‘ia ‘ave‘eseina le agasala, ‘ina ‘ua faia o ia e ia ma taulaga.
27. Pei ‘ona tofia fo‘i mo tagata ‘ia tasi lo latou oti, ‘ae mulimuli ane o le fa‘amasinoga.
28. Na fa‘apea fo‘i Keriso, ‘ua tasi lava lona avatua o ia ma taulaga, ‘ina ‘ia ‘aveina ai agasala a le to‘atele, e fa‘aali fo‘i o ia ‘iā te i latou o ē fa‘atalitali atu ‘iā te ia i lona fo‘i fa‘alua mai, e lē ‘ina ‘ia ‘aveina agasala, a ‘ia fa‘aolaina i latou.#