2. Auā na saunia le potu i luma, e ta‘ua o le mea pa‘ia, sa i ai le tu‘ugāmolī, ma le la‘o‘ai, ma le areto e laulauina i luma.
3. O ona tala atu fo‘i o le lua o ‘ie puipui sa i ai le potu e ta‘ua o le mea e sili ‘ona pa‘ia.
4. Sa i ai le ipu auro e fa‘amū ai mea manogi, ma le ‘atola‘au o le feagaiga ‘ua liloia i auro, sa i ai le ipu auro fa‘a‘ofu‘ofu sa i ai le manai, ma le to‘oto‘o o Arona sa tupu, ma papama‘a o le feagaiga.
5. Sa ona luga fo‘i kerupi pupula, sa malu‘ia ai le nofoa o le alofa; o mea ia e lē mafai ‘ona talatala ta‘itasi atu ai nei.
6. O lenei, ‘ua fa‘apea ‘ona saunia o ia mea, ‘ona ulufale so‘o lea o ositaulaga i le potu i luma, ma faia ai a latou galuega.
7. A o le potu i tua, e ta‘itasi i tausaga ma fo‘i fa‘atasi i ai na o le ositaulaga sili, e lē aunoa ma le toto, sa ositaulaga ai o ia mo ia lava, ‘atoa fo‘i ma sesē o le nu‘u;
8. ‘Ua fa‘ailoa mai ai e le Agaga Pa‘ia, e le‘i fa‘aalia le ala i le mea e sili ‘ona pa‘ia, ‘ina o tu pea le mua‘i fale fetāfa‘i.
9. O le fa‘atusa lea e o‘o mai i nei ona po, o lo‘o avatu ai mea alofa ma taulaga, e lē mafaia ‘ona fa‘a‘ato‘atoaina i la lona loto fuatia ifo o lē ‘au‘auna i ai.
10. O i ai na o mea e ‘ai, ma mea e inu, ma fuluga ‘ese‘ese i le vai, ma fa‘atonuga fa‘aletino, na fa‘atūina se‘ia o‘o i ona po o le toe fuata‘iga.
11. A o Keriso ‘ua maliu mai, o le ositaulaga sili i mea lelei ‘ua aulia, ‘ua ui ane i le fale fetāfa‘i e sili ‘ona lelei ma ‘ona ‘ato‘atoa, e lē faia e lima, o lona uiga e lē faia fa‘alelalolagi nei.
12. ‘Ona ulu fa‘atasi lava lea o ia i totonu o le mea pa‘ia, e lē ma le toto o ‘oti ma tama‘i povi, a o lona lava toto, ‘ua na maua le togiola fa‘avavau mo i tatou.