10. O i ai na o mea e ‘ai, ma mea e inu, ma fuluga ‘ese‘ese i le vai, ma fa‘atonuga fa‘aletino, na fa‘atūina se‘ia o‘o i ona po o le toe fuata‘iga.
11. A o Keriso ‘ua maliu mai, o le ositaulaga sili i mea lelei ‘ua aulia, ‘ua ui ane i le fale fetāfa‘i e sili ‘ona lelei ma ‘ona ‘ato‘atoa, e lē faia e lima, o lona uiga e lē faia fa‘alelalolagi nei.
12. ‘Ona ulu fa‘atasi lava lea o ia i totonu o le mea pa‘ia, e lē ma le toto o ‘oti ma tama‘i povi, a o lona lava toto, ‘ua na maua le togiola fa‘avavau mo i tatou.
13. Auā ‘āfai o le toto o povi po‘a, ma ‘oti, ma le lefulefu o le povi fafine ta‘anoa, ‘ua sausau atu ai i ē ‘ua leaga, e fa‘apa‘iaina ai e o‘o i le fa‘amamāina o le tino.
14. E lē sili ‘ea ‘ona fa‘amamāina o ‘outou loto fuatia ifo a‘i galuega e oti ai, i le toto o Keriso, o lē na avatua o ia e ia i le Agaga fa‘avavau e fai ma taulaga e lē ponā i le Atua, ‘ina ‘ia ‘outou ‘au‘auna i le Atua soifua?
15. O le mea fo‘i lea, o lo‘o fai ai o ia ma puluvaga o le feagaiga fou, ‘ona o lona maliu fo‘i e togiola a‘i agasala na faia a o i le mua‘i feagaiga, ‘ia maua ai e i latou ‘ua vala‘auina o le tofi fa‘avavau na folafolaina.
16. Auā pe a fai se mavaega, se‘i ‘iloga e oti lē ana le mavaega, ‘ona o‘o ai lea;
17. auā e fa‘amaonia se mavaega ‘ona o le oti, ‘ina ‘ua lē aogā a o ola mai lē ana le mavaega.
18. Auā na lē fa‘amauina lē na muamua a o lē o i ai se toto.
19. Auā ‘ua uma ‘ona ta‘uina atu e Mose i le nu‘u uma lava o poloa‘iga uma e tusa ma le tulafono, ‘ona tago atu lea o ia i le toto o tama‘i povi ma ‘oti, ‘atoa ma le vai, ma fulufulu mamoe e mūmū, ma isopo, ‘ua ia sausauina atu ai le Tusi, ‘atoa ma le nu‘u uma lava.
20. ‘Ua fai atu, “O le toto lenei o le feagaiga ‘ua poloa‘iina atu e le Atua ‘iā te ‘outou.”
21. O le fale fetāfa‘i fo‘i ‘atoa ma mea uma e ‘au‘auna a‘i na ia sausauina atu ai fa‘apea i le toto.
22. Na toe ‘inā uma fo‘i o mea uma ‘ona fa‘amamāina i le toto e tusa ma le tulafono; a lē o i ai fo‘i se fa‘amaligiina o le toto, ‘ua leai fo‘i se fa‘amāgaloina.
23. O le mea lea sa tatau ai ‘ona fa‘amamāina o fa‘atusa o mea o i le lagi i ia mea; a o mea fa‘alelagi lava e fa‘amamāina i taulaga e sili ‘ona lelei i ia mea.
24. Auā ‘ua lē ulu atu Keriso i le mea pa‘ia ‘ua faia e lima, o le fa‘atusa lea o le mea moni, a o le lagi lava, ‘ina ‘ia iloa ai nei o ia i luma o le Atua mo i tatou.