Feagaiga Tuai

Feagaiga Fou

Efeso 5:1-14 O LE TUSI PA'IA - Ekalesia Katoliko Roma (RSCB)

1. O lenei, ‘ia fa‘aa‘oa‘o ‘outou i le Atua, fa‘apei o le fānau pele;

2. ma ‘ia sāvavali i le alofa, fa‘apei o Keriso fo‘i na ia alofa mai ‘iā i tatou, ‘ua na foa‘i mai fo‘i o ia lava mo i tatou, o le taulaga ma le togiola i le Atua o le mea manogi lea.

3. A o le faita‘aga, ma amio leaga uma, po o le manumanu fo‘i, ‘aua ne‘i ta‘ua lava ‘iā te ‘outou, e pei ‘ona tatau i ē ‘ua pa‘ia.

4. O le anovale fo‘i, ma le tautala i ‘upu fa‘atauva‘a ma le fa‘aulaula, o mea ia e lē tatau; a o le fa‘afetai e lelei lava lea.

5. Auā ‘ua ‘outou iloa lenei mea, ‘ai sē faita‘aga, po o sē fai amio leaga, po o sē manumanu, (o le ifo i tupua lava lea,) e lē maua e i latou se tofi i le mālō o Keriso ma le Atua.

6. ‘Aua ne‘i fa‘asesēina ‘outou e se tasi i ‘upu fa‘atauva‘a; auā o mea ia e o‘o mai ai le to‘asā o le Atua i ē fa‘alogogatā.

7. O lenei, ‘aua ne‘i fa‘atasi ‘outou ma i latou;

8. auā sa ‘outou pouliuli anamua, a o lenei ‘ua ‘outou malamalama i le Ali‘i; ‘inā sāvavali ‘ia pei o ē ‘ua malamalama;

9. auā o le fua o le malamalama, o le agalelei uma lava lea, ma le amiotonu, ma le fa‘amaoni.

10. ‘Ia su‘esu‘e ‘outou pe se a se mea e fiafia i ai le Ali‘i.

11. ‘Aua fo‘i tou te amio fa‘atasi ma galuega lē aogā a le pouliuli, ‘ae lelei ‘ona ‘outou ‘aumai ia mea i le malamalama.

12. Auā o mea ‘ua faia fa‘alilolilo e i latou, ‘ua matagā lava ‘ona tautalatala i ai.

13. A o mea uma lava ‘ua ‘aumai i le malamalama, ‘ua fa‘aalia, o mea uma fo‘i e fa‘aalia, o le malamalama lea.

14. O le mea lea ‘ua fai mai ai,“Ala ia oe e moe na,ma e tula‘i mai i ē ‘ua oti,‘ona fa‘amalamalama mai lea o Keriso ‘iā te oe.”

Faitau le mataupu e atoatoa Efeso 5