1. O ‘outou fo‘i lava o ē na oti i amio leaga ma agasala,
2. na ‘outou sāvavali ai anamua e tusa ma le tu a lenei lalolagi, e tusa, ma le ta‘ita‘i o le ‘au faipule i le vā nimonimo, o le agaga lea o lo‘o matuā galue nei i ē ‘ua fa‘alogogatā.
3. O i tatou fo‘i, na amio fa‘atasi i tatou uma lava ma i latou anamua, ‘ina ‘ua tatou nonofo i tu‘inanau o tatou tino, na faia fo‘i e i tatou o mea na loto i ai le tino ‘atoa ma le mafaufau, na fānau mai fo‘i i tatou o le fānauga a le to‘asā, fa‘apei o isi ‘atoa fo‘i.
4. A o le Atua, ‘ua i ai le faula‘i o le alofa, ‘ona o lona lava alofa tele, na ia alofa mai ai ‘iā i tatou,
5. a o oti lava i tatou i amio leaga, ‘ua na fa‘aola mai ‘iā i tatou fa‘atasi ma Keriso; (o le alofa tunoa ‘ua fa‘aolaina ai ‘outou.)
6. ‘Ua na toe fa‘atutū fa‘atasi mai fo‘i, ma fa‘anonofo fa‘atasi i tatou ma Keriso Iesu i mea o i le lagi.
7. ‘Ina ‘ia fa‘aalia i tupulaga atalī le silisili ‘ese o le faula‘i o lona alofa tunoa le agalelei mai ‘iā te i tatou, ‘iā Keriso Iesu.
8. Auā o le alofa tunoa ‘ua fa‘aolaina ai ‘outou i le fa‘atuatua e lē mai ‘iā te ‘outou fo‘i lea, a o le mea na foa‘iina mai e le Atua.
9. E lē ‘ona o galuega, ‘ina ne‘i mitamita se tasi.
10. Auā o lana lava galuega i tatou, na faia i tatou ‘iā Keriso Iesu, ‘ina ‘ia faia galuega lelei, na saunia anamua e le Atua, ‘ina ‘ia tatou sāvavali ai.
11. O lenei, ‘ia ‘outou manatu, sa fa‘apaupau ‘outou anamua i la le tino, na ta‘ua ‘outou o ē “lē peritomeina” e i latou o ē ‘ua ta‘ua ‘ua “peritomeina,” o le peritomeina le ‘ua faia e lima i le tino.
12. O ona pō ia sa lē i ai ‘iā te ‘outou Keriso, sa tagata ‘ese ‘outou i le nu‘u o Isaraelu, o tagata ‘ese fo‘i i feagaiga ‘ua i ai le mea na folafolaina, sa leai so ‘outou fa‘amoemoe, sa aunoa fo‘i ma le Atua i le lalolagi.
13. A o ona pō nei, ‘ona o Keriso Iesu, o ‘outou sa vāvā mamao anamua ‘ua fa‘alatalataina mai ai i le toto o Keriso.
14. Auā o ia lana o lo tatou leleiga ‘ua na faia ‘ia tasi ē sa fa‘alua, na na sōloia fo‘i le pā vaeloto o le feitaga‘i sa vaeluaina ai.
15. Auā ‘ua ia fa‘aumatia fo‘i lona lava tino le tulafono i poloa‘iga ma fa‘atonuga; ‘ina ‘ia liliu e ia lava lea to‘alua ‘ia fai ma tagata fou e tasi, ‘ia tupu ai le leleiga;
16. ma ia fa‘aleleia ma le Atua ē sa to‘alua, i le tino e tasi, ‘ona o le satauro, ‘ina ‘ua fa‘aumatia ai le feitaga‘i.
17. Na maliu mai fo‘i o ia, e folafola mai le tala lelei o le leleiga ‘iā te ‘outou sa vāvā mamao, ‘atoa ma ē ‘ua latalata.
18. Auā ‘ua fa‘atau maua e i tatou uma ‘ona o ia o le ala e sao atu i le Tamā, e le Agaga e to‘atasi.
19. O lenei, e lē toe tagata ‘ese ‘outou, po o ē ‘ua āumau, a ‘ua nu‘u fa‘atasi ma le ‘au pa‘ia, o le ‘āiga fo‘i o le Atua.
20. O lo‘o ‘ua atiina a‘e i luga o le fa‘avae o le ‘au ‘aposetolo, ‘atoa ma le ‘au perofeta, o le ma‘a tulimanu o Keriso Iesu lava lea.
21. ‘Ua fa‘atatauina ‘iā te ia le fale ‘atoa, o lo‘o alu a‘e, ‘ina ‘ia fai ma malumalu pa‘ia i le Ali‘i.
22. O ‘outou fo‘i ‘ua atiina a‘e fa‘atasi ‘outou ‘iā te ia e fai ma afio‘aga o le Atua i le Agaga.#