1. O lenei, o oe lo‘u atali‘i e, ‘ia fa‘amalosia oe i le alofa tunoa o lo‘o ‘iā Keriso Iesu.
2. O mea fo‘i na e fa‘alogologo mai ai ‘iā te a‘u i luma o molimau e to‘atele, ‘ia e tu‘uina atu ai i tagata fa‘amaoni, o ē ‘ua mafaia ‘ona a‘oa‘oina atu i nisi.
3. O lenei, ‘ia e ‘onosa‘i i mea e tigā ai, fa‘apei o se tagata tau e lelei a Iesu Keriso.
4. E leai sē tau i le tau‘a na te fa‘alavelavea o ia e ia i mea o le olaga sa masani, ‘ina ‘ia fa‘afiafia o ia i lē na filifili ‘iā te ia e fai ma tagata tau.
5. ‘Āfai fo‘i e fīnau se tasi i le fia mālō tausinioga, e lē fa‘apaleina o ia pe a lē fīnau e tusa ma tulafono.
6. O lē galue i fanua e tatau ‘ona mua‘i maua e ia le fua.
7. ‘ia e mafaufau i mea ‘ou te fai atu na; ‘ona foa‘iina atu ai lea e le Ali‘i ‘iā te oe le loto matala i mea uma.
8. ‘Ia e manatua Iesu Keriso ‘ua fa‘atūina mai o ia nai ē ‘ua oti, o le fānau lava a Tavita, e tusa ma la‘u tala lelei.
9. ‘Ona o lea ‘ua tigāina ai a‘u, ‘ua o‘o ‘ina noanoatia o a‘u, peiseaī se pagotā; a o le afioga a le Atua e lē noatia lava lea.
10. O le mea lea ‘ou te ‘onosa‘i ai i mea uma ‘ona o le ‘au filifilia, ‘ina ‘ia maua e i latou lava le fa‘aolataga o lo‘o ‘iā Keriso Iesu ma le manuia e fa‘avavau.
11. O le ‘upu moni lenei:Pe ‘āfai tatou te oti fa‘atasi ma ia,tatou te ola fa‘atasi ai fo‘i.
12. Pe ‘āfai tatou te ‘onosa‘i,e fai fo‘i i tatou ma tupu fa‘atasi ma ia.Pe ‘āfai tatou te fa‘afiti ‘iā te ia,e fa‘afiti fo‘i o ia ‘iā te i tatou.
13. ‘Āfai e lē fa‘amaoni i tatou,e fa‘amaoni pea lava ia,e lē mafaia e ia ‘ona fa‘afiti ‘iā te ia.
14. ‘Ia e fa‘amanatu ‘iā te i latou i ia mea, ma ta‘utino i luma o le Ali‘i, ‘aua ne‘i latou fefīnaua‘i i ‘upu e leai se aogā, ‘ae fa‘asesēina ai o ē fa‘alogologo i ai.
15. ‘ia e taumafai ‘ina ‘ia ‘avea oe ma lē ‘ua fiafia mai i ai le Atua, o le faigaluega e leai se mea e mā ai, na te tala‘itonuina le ‘upu moni.
16. A ‘ia e taumamao ma ‘upu fa‘alelalolagi ma le lē aogā; auā e tupu atili ai le amio fa‘alēmata‘u.
17. O a latou ‘upu fo‘i e ‘a‘ati pei o se papala; o i ai Umenio ma Fileto;
18. o i lā‘ua ia ‘ua sesē i le ‘upu moni, i lo latou fa‘apea ane, ‘ua mavae lava le toetū; ‘ua fa‘aliliu ‘ese ai nisi tagata i le fa‘atuatua.
19. ‘Ae ui lava i lea o le fa‘avae mau o le Atua e tu lava lea, o lo‘o i ai lenei fa‘ailoga, “‘Ua silafia e le Ali‘i ona lava tagata;” ‘atoa ma lea, “‘Ia ō ‘ese i le amio leaga i latou uma o ē ta‘uta‘u le suafa o le Ali‘i.”
20. ‘Ua lē na o ipu auro ma le ario ‘ua i le fale tele, a o ipu la‘au ma ‘omea; o isi ‘ua ta‘uleleia, a o isi ‘ua ta‘uleagaina.
21. O lenei, ‘ai se tasi e fa‘amamā ‘iā te ia a‘i nei mea, ‘ua ta‘uleagaina, e fai o ia ma ipu e ta‘uleleia, e fa‘asāina, e aogā fo‘i mo le ali‘i, ‘ua saunia mo galuega lelei uma.
22. ‘Ia e sola ‘ese i tu‘inanau o taulele‘a, ‘ia e tausisi i le amiotonu, ma le fa‘atuatua, ma le alofa, ‘atoa ma le filemū, fa‘atasi ma i latou o ē vala‘au i le Ali‘i ai le loto mamā.
23. A o fefinaua‘iga vālea ma le leai se uiga, ‘ia e ‘alo ‘ese ai, auā ‘ua iloa o mea ‘ia e tupu ai femisa‘iga.
24. Auā e lē tatau ‘ona fīnau o le ‘au‘auna a le Ali‘i, a ‘ia agamalū i tagata uma, ‘ia mafaia ‘ona a‘oa‘o atu ma ‘ia ‘onosa‘i.
25. ‘Ia a‘oa‘o atu ma le agamalū i ē e fīnau mai; pe mafai lava le Atua ‘ona foa‘i atu ‘iā te i latou le salamō, ‘ina ‘ia latou iloa lelei le ‘upu moni.
26. ‘Ia latou ala mai fo‘i na moe i le mailei a le tiapolo, o ē ‘ua maua e ia, e fai lona lava finagalo.