1. O le toe ‘upu lenei, le ‘au uso e, ‘ia ‘outou tatalo mo i matou, ‘ia tele vave ma ‘ia mamalu le afioga a le Ali‘i, e fa‘apei ‘ona fai ‘iā te ‘outou.
2. ‘Ia lavea‘iina fo‘i i matou ai tagata amio leaga ma ē agasala; auā e lē o i tagata uma le fa‘atuatua.
3. A o lo‘o fa‘amaoni le Ali‘i, na te fa‘atumauina ‘outou, ma leoleoina ‘ina ne‘i leaga.
4. Matou te fa‘atuatua fo‘i i le Ali‘i ‘iā te ‘outou, o lo‘o faia e ‘outou o mea na matou fai atu ai ‘iā te ‘outou, i le tou te faia pea lava.
5. ‘Ia ta‘ita‘i tonu fo‘i e le Ali‘i o ‘outou loto i le alofa o le Atua ma le ‘onosa‘i o Keriso.
6. Matou te fai atu ‘iā te ‘outou, le ‘au uso e, i le suafa o lo tatou Ali‘i o Iesu Keriso, tou te vavae ‘ese i uso uma o ē amio fa‘atalanoa, ma le lē tusa ma le ‘uputu‘u na latou maua ‘iā te i matou.
7. Auā ‘ua ‘outou iloa lava, e tatau ‘ona ‘outou fa‘aa‘oa‘o mai ‘iā te i matou; auā sa matou lē amio fa‘atalanoa ‘ina o ‘iā te ‘outou.
8. Matou te le‘i ‘a‘ai fua fo‘i se mea e ‘ai a se tasi, a ‘ua matou galulue i le galuega mamafa ma le tigā i le po ma le ao, ‘ina ne‘i mafatia so ‘outou.
9. E lē ‘ina ‘ua leai sa matou pule, ‘ae peita‘i ‘ia ‘avea i matou ma fa‘aa‘oa‘o ‘iā te ‘outou ‘ina ‘ia ‘outou fa‘aa‘oa‘o mai ‘iā te i matou.
10. Auā sa tatou i ai ma ‘outou, ‘ua matou fai atu lenei mea ‘iā te ‘outou, pe ‘āfai e lē fia galue se tasi, ‘aua ne‘i ‘ai fo‘i o ia.
11. Auā ‘ua matou fa‘alogo o ‘iā te ‘outou nisi ‘ua amio fa‘atalanoa, e lē o galulue lava, a o matamata fua i galuega a nisi.
12. Matou te fai atu i ē o fa‘apea, ma ‘ai‘oi atu i ai ‘ona o lo tatou Ali‘i o Iesu Keriso, ‘ia latou galulue ma le nofo fīfīlemū, ma ‘ia latou ‘a‘ai ‘iā latou lava mea e ‘ai.
13. A o ‘outou le ‘au uso e, ‘aua ne‘i ‘outou fa‘avaivai i le amio lelei.
14. Pe ‘āfai e lē gaua‘i se tasi i la matou ‘upu i lenei tusi, ‘ia fa‘ailogaina lea tagata; ‘aua fo‘i tou te feoa‘i ma ia, ‘ina ‘ia māsiasi ai o ia.
15. ‘Aua fo‘i tou te manatu o ia o le fili, a ‘ia ‘outou apoapoa‘i atu ‘iā te ia pei o le uso.
16. O lenei, o le Ali‘i lava e ona le manuia, ‘ia foa‘iina atu e ia le manuia ‘iā te ‘outou e lē aunoa i mea uma lava. ‘Ia ‘iā te ‘outou uma lava le Ali‘i.
17. O le alofa o a‘u o Paulo ‘ua tusia i lo‘u lava lima, o le fa‘ailoga lea i a‘u tusi uma lava ‘ou te tusi fa‘apea lava.
18. ‘Ia ‘iā te ‘outou uma lava le alofa tunoa o lo tatou Ali‘i o Iesu Keriso. Amene.