1. O Paulo, ma Siluano, ma Timoteo; i le ekalesia o tagata Tesalonia, o i le Atua lo tatou Tamā, ma le Ali‘i o Iesu Keriso.
2. ‘Ia ‘iā te ‘outou le alofa tunoa ma le manuia mai le Atua le Tamā, ma le Ali‘i o Iesu Keriso.
3. E tatau ‘ona matou fa‘afetai e lē aunoa i le Atua ‘ona o ‘outou, le ‘au uso e, e fa‘apei ‘ona tusa ai, auā ‘ua tupu tele lava lo ‘outou fa‘atuatua, ‘ua fa‘ateleina fo‘i lo ‘outou fealofani o ‘outou uma lava ta‘ito‘atasi.
4. O lea matou te mitamita ai ‘iā te ‘outou o i matou nei lava, i ekalesia a le Atua, ‘ona o lo ‘outou ‘onosa‘i ma lo ‘outou fa‘atuatua, i ona po o sauāga uma ma puapuagā ‘ua ‘outou fa‘ato‘ato‘a ai.
5. O le fa‘ailoga lea o le fa‘amasinoga tonu a le Atua, ‘ina ‘ia ta‘uaogāina ‘outou i le mālō o le Atua, o le mea lea e tigāina ai ‘outou.
6. Auā ‘ua tonu i le Atua e taui atu le puapuagā i ē ‘ua fa‘apuapuagāina ai ‘outou;
7. e ‘iā te ‘outou fo‘i o ē puapuagāina, o le mapusaga fa‘atasi ma i matou, pe a fa‘aalia le Ali‘i o Iesu mai le lagi, fa‘atasi ma agelu o lona malosi i le afi mumū,
8. na te taui ma sui i ē ‘ua lē iloa le Atua, ma ‘ua lē ‘ana‘ana i le tala lelei a lo tatou Ali‘i o Iesu Keriso.
9. E fa‘asalaina i latou lava i le fanoga e fa‘avavau lava, ‘ia te‘a ma le Ali‘i ma le mamalu o lona malosi,
10. pe a afio mai o ia ‘ina ‘ia vi‘ia i ona lava tagata pa‘ia, ma ‘ia ofoofogia o ia i lenā aso ‘iā te i latou uma o ē fa‘atuatua, auā na ‘outou talitonu mai lava i la matou mau.
11. O le mea fo‘i lea matou te fa‘atoga atu ai e lē aunoa mo ‘outou, ‘ina ‘ia ta‘uaogāina ‘outou e lo tatou Atua e tusa ma lana vala‘au ‘iā te ‘outou ma ‘ia fa‘a‘ato‘atoaina e ia ma le malosi le loto mau lelei uma ma le galuega a le fa‘atuatua;
12. ‘ina ‘ia vi‘ia ‘ona o ‘outou le suafa o lo tatou Ali‘i o Iesu Keriso, ma ‘outou fo‘i ‘ona o ia, e tusa ma le alofa tunoa o lo tatou Atua, ma le Ali‘i o Iesu Keriso. #
Faitau le mataupu e atoatoa 2 Tesalonia 1