8. ‘Ae ‘aua ne‘i lilo ‘iā te ‘outou, le ‘au pele, lenei mea e tasi, e tusa i luma o le Ali‘i le aso e tasi ma tausaga e afe, o le afe fo‘i o tausaga e tusa ma le aso e tasi.
9. E lē fa‘atuai mai le Ali‘i i le mea na folafolaina mai, fa‘apei o le manatu a isi tagata i le fa‘atuai; ‘ae peita‘i ‘ua ‘onosa‘i mai lava o ia ‘iā te ‘outou, ‘ona ‘ua lē finagalo ia fano se tasi, a ‘ia o‘o uma lava i le salamō.
10. ‘Ae sau le aso o le Ali‘i pei o se gaoi i le pō, e mavae‘eseina ai le lagi ma le gogolo tele, e te‘a ‘ese‘ese ai fo‘i o mea na fai a‘i ‘ina ‘ua mū; o le lalolagi fo‘i ma galuega o i ai e susunuina lava.
11. O lenei, o le a te‘a ‘ese‘ese nei mea uma, pe fa‘apefea la ‘outou amio e tatau ai i le amio lelei ma le amio Atua.
12. O lo‘o fa‘atalitali ma naunau atu ‘ia aulia mai le aso o le Atua, e te‘a ‘ese‘ese ai le lagi ‘ina ‘ua mū, e liu suāvai fo‘i o mea na fai a‘i ‘ina ‘ua mū?
13. ‘Ae fa‘atalitali i tatou i le lagi fou ma le lalolagi fou, pei o lana na folafola mai, e mau ai le amiotonu.
14. O lenei, le ‘au pele e, ‘ua ‘outou fa‘atalitali i ia mea, o lea ‘ia ‘outou finafinau ai lava ‘ina ‘ia maua ‘outou e ia ma le manuia, ‘ua lē ponā, ma le lē mata‘uleagaina.
15. ‘Ia ‘outou manatu o le ‘onosa‘i o lo tatou Ali‘i o le fa‘aolataga lea; fa‘apei ‘ona tusi atu ‘iā te ‘outou e Paulo lo tatou uso pele, e tusa ma le poto ‘ua foa‘iina atu ‘iā te ia.
16. Fa‘apei o ana tusi uma lava, o lo‘o talatalaina ai nei mea; o i ai nisi ‘upu fa‘amatalagatā, ‘ua fa‘auiga‘eseina e tagata e le‘i a‘oa‘oina, ma ‘ua lē fa‘atumauina, fa‘apei o isi Tusi fo‘i e o‘o ai lo latou lava malaia.
17. O lenei, le ‘au pele e, ‘ia ‘outou fa‘aeteete ‘iā te ‘outou, auā ‘ua mua‘i iloa e ‘outou, ne‘i ta‘ita‘i‘eseina ‘outou i le sesē o ē fa‘alētaupulea, tou te pa‘u‘ū ai i le mea sa ‘outou tumau ai.
18. A ‘ia tutupu ‘outou i le alofa tunoa ma le poto i lo tatou Ali‘i, o lo tatou Fa‘aola lea o Iesu Keriso. ‘Ia ‘iā te ia le vi‘iga i ona po nei, ma ‘ia o‘o i le aso fa‘avavau. Amene.