1. O a‘u o Simona Peteru, o le ‘au‘auna ma le ‘aposetolo a Iesu Keriso, o la‘u tusi lenei i ē ‘ua maua le fa‘atuatua e tusa lona lelei ma lo matou, i le amiotonu o lo tatou Atua, o lo tatou Fa‘aola lea o Iesu Keriso.
2. ‘Ia fa‘ateleina ‘iā te ‘outou le alofa tunoa ma le manuia i lo ‘outou iloa lelei le Atua, ‘atoa ma lo tatou Ali‘i o Iesu.
3. ‘Ua foa‘iina mai ‘iā te i tatou e lona mana Atua o mea uma, e o‘o ai i le ola ma le amio Atua, i lo tatou iloa lelei o lē na vala‘au mai ‘iā i tatou i lona mamalu ma lona lelei silisili.
4. ‘Ona o lea ‘ua ia folafolaina mai ai o mea e silisili ‘ese lava ma le aogā, ‘ina ‘ia tofusia fa‘atasi ai ‘outou i le amio Atua, ‘ina ‘ua sōsōla ‘ese ‘outou i le amio leaga o i le lalolagi i le tu‘inanau.
5. O le mea lava lea ‘ia ‘outou matuā fa‘amalosi ai lava, ‘ina ‘ia fa‘aopoopoina le amio lelei i lo ‘outou fa‘atuatua, ‘ia fa‘aopoopo fo‘i le iloa i le amio lelei,
6. ‘ia fa‘aopoopo fo‘i le loto mamā i le iloa, ma ‘ia fa‘aopoopo le ‘onosa‘i i le loto mamā, o le amio Atua fo‘i i le ‘onosa‘i,
7. ‘ia fa‘aopoopo fo‘i le fealofani o le ‘au uso i le amio Atua, o le alofa fo‘i i le fealofani o le ‘au uso.
8. Auā pe a maua e ‘outou ia mea, ma ‘ua fa‘ateleina, ‘ona ‘avea ai lea o ‘outou ma ē ‘ua lē paiē, a o ē fua mai le iloa lelei o lo tatou Ali‘i o Iesu Keriso.
9. Auā o ia e lē o i ai nei mea, ‘ua tauaso ia, ‘ua fa‘asegosego, ‘ua fa‘agalogalo fo‘i e ia o le fa‘amamāina o ana agasala tuai.