1. O a‘u o le toeaina, o la‘u tusi lenei i le tama‘ita‘i ‘ua filifilia, ma ana fānau, ‘ou te alofa fa‘amaoni i ai. E lē na o a‘u fo‘i, a o i latou uma o ē ‘ua iloa i le ‘upu moni.
2. ‘Ona o le ‘upu moni o lo‘o tumau ‘iā te i tatou, o ‘iā te i tatou fo‘i e fa‘avavau.
3. ‘Ia ‘iā te ‘outou le alofa tunoa ma le alofa ma le manuia mai le Atua le Tamā, ‘atoa ma le Ali‘i o Iesu Keriso, o le Alo o le Tamā, i le fa‘amaoni ‘atoa ma le alofa.
4. E tele lava lo‘u fiafia ‘ina ‘ua ‘ou iloa ni a‘u fānau o ē sāvavali i le ‘upu moni, fa‘apei o le poloa‘iga ‘ua tatou maua mai le Tamā.
5. O lenei, le tama‘ita‘i e, ‘ou te ‘ai‘oi atu ‘iā te oe, ‘ou te lē tusi atu ‘iā te oe e peiseaī o se poloa‘iga fou, a o lea lava ‘ua ‘iā te i tatou talu le amataga, ‘ia tatou fealofani.
6. O lenei lava le alofa, ‘ia tatou sāvavali e tatau ma ana poloa‘iga; o lenei lava le poloa‘iga, fa‘apei ‘ona ‘outou fa‘alogo i ai talu le amataga, ‘ina ‘ia ‘outou sāvavali ai.
7. Auā e to‘atele o ē fa‘asesē ‘ua ō atu i le lalolagi, o ē lē ta‘u tino ‘ua maliu mai Iesu Keriso i le tino; o le fa‘asesē lava lea ma le anetikeriso.
8. ‘Ia ‘outou ‘iā te ‘outou, ne‘i maumau a ‘outou galuega na ‘outou faia, a ‘ia maua le taui ‘atoa.
9. O i latou uma lava o ē tu‘umavaega, ‘ae lē tumau i le a‘oa‘oga ia Keriso, e lē o ‘iā te i latou le Atua; o lē tumau i le a‘oa‘oga ia Keriso, o ‘iā te ia lava le Tamā ‘atoa ma le Alo.
10. Pe a alu atu ‘iā te ‘outou se tasi ‘ae lē molia lenei lava a‘oa‘oga, ‘aua tou te talia o ia i o ‘outou fale, ‘aua fo‘i tou te ofo alofa ‘iā te ia.
11. Auā o sē ofo alofa atu ‘iā te ia, e fa‘atasi ai o ia ma ana galuega leaga.
12. O ‘iā te a‘u mea e tele e tusi atu ai ‘iā te ‘outou, a ‘ou te lē fia tusi atu i le laupepa ma le vaitusi; a ‘ou te fa‘amoemoe ‘ou te alu atu ‘iā te ‘outou, ‘ia tatou fetautalatala‘i, ‘ina ‘ia ‘ato‘atoa ai lo tatou ‘oli‘oli.
13. O lo‘o alolofa atu ‘iā te oe fānau a lou uso ‘ua filifilia.