1. O lea ‘ua lelei ai ‘iā te i matou ‘ia tu‘ua ai i matou i Atenai, tau o i matou, ‘ina ‘ua matou lē toe mafai ‘ona ‘onosa‘i.
2. A ‘ua matou ‘auina atu Timoteo lo matou uso, o le ‘au‘auna fo‘i o ia a le Atua, i le tala lelei ‘iā Keriso, ‘ina ‘ia fa‘amafanafanaina ‘outou tou te tumau ai i lo ‘outou fa‘atuatua.
3. ‘Ina ne‘i fa‘agae‘etia se tasi i nei puapuagā. Auā ‘ua ‘outou iloa ‘ua tofia i tatou i lenei lava mea.
4. Auā o ona po sā i ai i matou ‘iā te ‘outou, na matou mua‘i fai atu ai ‘iā te ‘outou, o le a o‘o mai le puapuagā, ‘ua fa‘apea ‘ona taunu‘u lava, ‘ua ‘outou iloa fo‘i.
5. O le mea lea na ‘ou lē toe mafai ai ‘ona ‘onosa‘i, ‘ona ‘auina atu lea e a‘u, ‘ina ‘ia ‘ou iloa lo ‘outou fa‘atuatua, ne‘i fa‘aosoosoina ‘outou e lē fa‘aosooso, ‘ona fa‘alēaogāina ai lea o la matou galuega.
6. A o lenei, ‘ua sau Timoteo ‘iā te i matou nai ‘iā te ‘outou, ‘ua ‘aumai fo‘i le tala lelei ‘iā te i matou i lo ‘outou fa‘atuatua, ma lo ‘outou alofa, ma lo ‘outou manatu lelei mai e lē aunoa ‘iā te i matou, o lo‘o fa‘anaunau fo‘i ‘outou ‘ina ‘ia tatou feiloa‘i ma ‘outou, pei o i matou ‘ona fia feiloa‘i ma ‘outou;
7. O le mea lea, le ‘au uso e, na fa‘amafanafanaina mai ai i matou ‘ona o ‘outou, i lo matou puapuagā uma lava, ‘atoa ma lo matou tigā, ‘ona o lo ‘outou fa‘atuatua.