8. ‘Ou te fai atu ‘ea nei mea i ‘upu a tagata? E lē o fai mai fo‘i ‘ea e le tulafono nei mea?
9. Auā ‘ua tusia i le tulafono a Mose, “‘Aua ‘e te fusi le gutu o le povi a o solisolia e ia saito.” O povi ‘ea e manatu i ai le Atua?
10. Po ‘ua na lē fetalai mai ‘ea ‘ona o i tatou lava? ‘Ona o i tatou fo‘i ‘ua tusia mai ai, auā e tatau i lē na te suatia le ‘ele‘ele ‘ia suatia ma le fa‘amoemoe, o lē solisolia fo‘i saito, ‘ia solisolia ma le fa‘amoemoe, ‘ina ‘ia maua le mea ‘ua fa‘amoemoe i ai.
11. ‘Āfai ‘ua matou lūlū atu mā ‘outou mea fa‘aleagaga, o le mea tele ‘ea pe a matou selesele mai a ‘outou mea fa‘aletino?
12. A pule isi ‘iā te ‘outou, e lē sili ‘ea ‘ona pule o i matou?‘Ae lē faia e i matou lenā pule; a ‘ua matou ‘o‘ono i mea uma, ‘ina ne‘i matou tu‘uina atu se mea e fa‘alavelave ai le tala lelei ‘iā Keriso.
13. Tou te lē iloa ‘ea, o ē galulue i mea pa‘ia latou te ‘a‘ai i mea mai le malumalu? O ē ‘au‘auna i le fatafaitaulaga ‘ua latou tofu i tufa‘aga fa‘atasi ma le fata.
14. ‘Ua fa‘apea fo‘i le poloa‘iga a le Ali‘i i ē folafola le tala lelei e maua mea a le tino i le tala‘iga o le tala lelei.
15. A ‘ou te lē faia se mea e tasi o na mea, ‘ou te lē tusi atu fo‘i nei mea ‘ina ‘ia fa‘apea ‘ona fai ‘iā te a‘u; auā e lelei ‘ina ‘ou oti, ‘ae leaga ‘ina fa‘alēaogāina e se tasi lo‘u mitamita.
16. Auā ‘āfai ‘ou te folafola le tala lelei, e lē se mea lea ‘ou te mitamita ai, auā ‘ua leai sa‘u faitalia i lea mea. ‘Oi talofa fo‘i ‘iā te a‘u, pe a ‘ou lē folafolaina le tala lelei.
17. Auā ‘āfai ‘ou te faia lenei mea ma le loto, ‘ua ‘iā te a‘u le taui; peita‘i ane, a ‘ou lē faia ma le loto, ‘ua tu‘uina mai ‘iā te a‘u e fai ma ‘au‘auna tausi mea.
18. O lenei, se a ‘ea lo‘u taui? O lenei, pe a ‘ou folafolaina atu le tala lelei, ‘ia ‘ou avatu le tala lelei ma le lē tauia mai; ‘ina ‘ua malie lo‘u loto ‘ou te lē fa‘aaogā le pule ‘ua tatau ‘iā te a‘u i lo‘u tala‘i atu.
19. Auā e ui ‘ina ‘ou sa‘oloto mai tagata uma, ‘ua fa‘apologaina a‘u e a‘u mo tagata uma, ‘ina ‘ia atili ai ‘ona to‘atele ‘ou te maua.
20. Sa ‘ou fa‘apei o se Iutaia ‘iā Iutaia, ‘ina ‘ia maua ni Iutaia; ‘ua ‘ou fa‘apei o sē nofo i le tulafono i ē nonofo i le tulafono ‘ina ‘ia ‘ou maua ni ē nonofo i le tulafono;
21. ‘ua ‘ou fa‘apei o sē lē nofo i le tulafono i ē ‘ua lē nofo i le tulafono, e lē ‘ona ‘ua ‘ou lē nofo i le tulafono i le Atua, a ‘ua ‘ou nofo i le tulafono ‘iā Keriso, ‘ina ‘ia ‘ou maua ni ē ‘ua lē nofo i le tulafono.
22. ‘Ua ‘ou fa‘apei o sē vaivai i ē ‘ua vaivai, ‘ina ‘ia ‘ou maua ē ‘ua vaivai; ‘ua ‘avea a‘u ma mea uma mo tagata uma, ‘ina ‘ia i‘u lava ‘ina ola nisi ‘iā te a‘u.