1. Le ‘au uso e, ‘ou te loto ‘ina ‘ia ‘outou iloa, sa i lalo o le ao o tatou tamā uma, ma ui ane uma i le sami,
2. ma papatisoina uma ‘iā Mose i ē ao ma le sami,
3. ma ‘a‘ai uma i le mea e ‘ai e tasi fa‘aleagaga,
4. ma feinu uma i le vai e tasi fa‘aleagaga; auā na latou inu i le papa fa‘aleagaga sa mulimuli atu ‘iā te i latou, o lenā papa fo‘i o Keriso lea;
5. ‘ae peita‘i o le to‘atele o i latou ‘ua lē fiafia i ai le Atua, auā na fa‘ata‘atitia solo o latou tino i le vao.
6. Na fai fo‘i nā mea ma fa‘ailoga mo i tatou, ‘ina ne‘i tatou tu‘inanau atu i mea leaga, pei ‘ona tu‘inanau lava i latou.
7. ‘Aua fo‘i tou te ifo i tupua, pei o isi o i latou, pei ‘ona tusia, “Sa nonofo le nu‘u i lalo ma ‘a‘ai ma inu, ‘ona latou tutū lea i luga e sisiva.”
8. ‘Aua fo‘i tatou te faita‘aga, pei ‘ona faita‘aga o isi o i latou, ma fano ai i le aso e tasi e lua sefulu o afe ma afe e tolu.
9. ‘Aua fo‘i tatou te fa‘a‘ono‘ono ‘iā Keriso, pei ‘ona fa‘a‘ono‘ono o isi o i latou ma fano ai i gata.
10. ‘Aua fo‘i tou te muimui, pei ‘ona muimui o isi o i latou, ma fano ai i lē na te fasiotia.
11. Na o‘o nā mea uma ‘iā te i latou e fai ma fa‘ailoga; ‘ua tusia fo‘i e fai ma apoapoa‘iga mo i tatou o ē ‘ua aulia mai ai tausaga e gata ai.
12. O lenei, o lē manatu o lo‘o o tu ia, ‘inā fa‘aeteete ia ne‘i pa‘ū.
13. ‘Ua lē maua ‘outou e se tofotofoga e ‘ese i lo tagata; a ‘ua fa‘amaoni le Atua, o lē na te lē tu‘uina atu ‘outou i le tofotofoga e sili i se mea ‘ua ‘outou lavātia, ‘ae sauni fo‘i fa‘atasi ma le tofotofoga se mea e sao ai, ‘ina ‘ia ‘outou lavā ‘o‘ono.
14. O le mea lea a‘u pele e, ‘ia ‘outou sōsōla ‘ese ai i le ifo i tupua.