1. Le ‘au pele e, ‘aua tou te fa‘alogo i agaga uma lava, a ‘ia ‘outou tofotofo i agaga pe mai le Atua i latou; auā e to‘atele perofeta pepelo ‘ua ō atu i le lalolagi.
2. O le mea lenei tou te iloa ai le Agaga o le Atua, o agaga uma o ē ta‘utino, ‘ua maliu mai Iesu Keriso i le tino, mai le Atua lava i latou.
3. A o agaga uma o ē lē ta‘utino, ‘ua maliu mai Iesu Keriso i le tino, e lē mai le Atua i latou; o le anetikeriso lava lenei ‘ua ‘outou fa‘alogo ai o le a sau, o lo‘o i ai nei lava i le lalolagi.
4. O ‘outou, le fānau e, mai le Atua lava ‘outou, ‘ua ‘outou manumālō fo‘i ‘iā te i latou, auā e sili o ia ‘ua ‘iā te ‘outou, i lē ‘ua i le lalolagi.
5. O i latou uma o ē tautalatala i mea o le lalolagi e mai le lalolagi lava i latou, e fa‘alogo atu fo‘i le lalolagi ‘iā te i latou.
6. O i matou mai le Atua lava i matou, o lē ‘ua iloa le Atua e fa‘alogo mai o ia ‘iā te i matou; o lē lē mai le Atua e lē fa‘alogo mai o ia ‘iā te i matou; o le mea lea ‘ua tatou iloa ai le agaga moni ma le agaga sesē.
7. Le ‘au pele e, ‘ia tatou fealofani; auā mai le Atua le alofa; o i latou uma fo‘i o ē alolofa, ‘ua fānau mai i latou mai le Atua, ‘ua iloa fo‘i e i latou le Atua.
8. O sē lē alofa ‘ua lē iloa e ia le Atua; auā o le Atua, o le alofa lava ia.
9. O le mea lava lenei ‘ua fa‘aalia mai ai le alofa o le Atua ‘iā te i tatou, ‘ina ‘ua ‘auina mai e le Atua lona Alo e to‘atasi i le lalolagi, ‘ina ‘ia tatou ola ‘iā te ia.
10. O le alofa lava lenei, e lē ‘ona ‘ua tatou alofa i le Atua, a ‘ua alofa mai o ia ‘iā te i tatou, ma na ‘auina mai fo‘i lona Alo o le togiola mo a tatou agasala.
11. Le ‘au pele e, ‘āfai ‘ua fa‘apea ‘ona alofa mai o le Atua ‘iā te i tatou, e tatau ai ‘ona tatou fealofani.
12. E le‘i va‘ai lava se tasi i le Atua; ā tatou fealofani, ‘ua tumau le Atua i totonu ‘iā te i tatou, ‘ua ‘ato‘atoa fo‘i le alofa ‘iā te ia i totonu i a‘i tatou.
13. O le mea lava lenei ‘ua tatou iloa ai ‘ua tumau i tatou i totonu ‘iā te ia, o ia fo‘i i totonu i a‘i tatou, auā o lona Agaga ‘ua ia foa‘iina mai ‘iā te i latou.
14. O i matou fo‘i, ‘ua matou va‘aia, ‘ua matou molimau ai fo‘i, na ‘auina mai e le Tamā o le Alo, o le Fa‘aola o le lalolagi.
15. O sē ta‘utino atu, o Iesu o le Alo o le Atua o ia, o lo‘o tumau le Atua i totonu ‘iā te ia, o ia fo‘i o i totonu o le Atua.
16. O i tatou fo‘i, ‘ua tatou iloa ma ‘ua fa‘atuatua i le alofa ‘ua i le Atua ‘iā te i tatou. O le Atua, o le alofa lava ia; o lē tumau i le alofa, ‘ua tumau ia i totonu o le Atua, o le Atua fo‘i o i totonu ‘iā te ia.
17. O le mea lava lenei ‘ua ‘ato‘atoa ai le alofa ‘iā te i tatou, ‘ina ‘ia tatou maua le loto tele i le aso o le fa‘amasinoga; auā e pei o ia, e fa‘apea fo‘i i tatou i lenei lalolagi.
18. E leai se fefe i le alofa, a o le alofa ‘ato‘atoa e fa‘ate‘a‘eseina ai le fefe. O le mea lea o le alofa e lē ‘ato‘atoa i se tasi e fefe auā e tatau lava ‘ona fa‘asalaina le fefe.
19. O i tatou, ‘ua tatou alolofa ‘iā te ia, auā na ia mua‘i alofa mai ‘iā te i tatou.
20. Pe ‘āfai e fa‘apea mai se tasi, “‘Ou te alofa i le Atua, ‘ae ‘ino‘ino i lona uso,” o le pepelo lava ia; auā o lē lē alofa i lona uso ‘ua ia va‘ai atu i ai, pe mafai fa‘apefea ‘ona alofa o ia i le Atua ‘ua ia lē va‘ai atu i ai.
21. O lenei fo‘i le poloa‘iga ‘ua tatou maua mai ‘iā te ia, o lē alofa i le Atua ‘ia alofa fo‘i o ia i lona uso.