Le mataupu

  1. 1
  2. 2
  3. 3
  4. 4
  5. 5

Feagaiga Tuai

Feagaiga Fou

1 Ioane 2 O LE TUSI PA'IA - Ekalesia Katoliko Roma (RSCB)

O Keriso o lo Tatou Fesoasoani Sili

1. Si a‘u fānau e, ‘ou te tusi atu nei mea ‘iā te ‘outou, ‘ina ne‘i agasala ‘outou; pe ‘āfai fo‘i e agasala se tasi, o ‘iā te i tatou le fautua i luma o le Tamā, o Iesu Keriso lea, o lē amiotonu.

2. O le togiola fo‘i o ia mo a tatou agasala, e lē gata fo‘i ‘iā tatou, ‘ae ‘atoa fo‘i ma agasala a le lalolagi uma lava.

3. O le mea fo‘i lea tatou te iloa ai ‘ua tatou iloa o ia, pe ‘āfai tatou te tausi i ana poloa‘iga.

4. O sē fa‘apea, “‘Ua ‘ou iloa o ia,” ‘ae lē tausi e ia i ana poloa‘iga, o le pepelo lava lea, e lē o i totonu ‘iā te ia le ‘upu moni.

5. A o lē tausi i lana afioga, e moni, ‘ua ‘ato‘atoa le alofa i le Atua i totonu ‘iā te ia. O le mea lea ‘ua tatou iloa ai o i totonu ‘iā te ia i tatou.

6. O lē fa‘apea “o lo‘o tumau ia i totonu ‘iā te ia,” e tatau ‘ona savali o lenā tagata fa‘apei ‘ona savali o ia.

O le Poloa‘iga Fou

7. Le ‘au uso e, ‘ou te lē tusi atu ‘iā te ‘outou se poloa‘iga fou, a o le poloa‘iga tuai, ‘ua ‘iā te ‘outou talu le amataga; o le poloa‘iga tuai o le ‘upu lea ‘ua ‘outou fa‘alogologo ai talu le amataga.

8. ‘Ou te tusi atu fo‘i le poloa‘iga fou ‘iā te ‘outou, ‘ua moni lea mea ‘iā te ia, ‘atoa ma ‘outou, auā o lo‘o mavae atu le pouliuli, a ‘ua pupula mai nei lava le malamalama moni.

9. O lē fa‘apea, “o i le malamalama o ia,” a o lo‘o ‘ino‘ino i lona uso, o i le pouliuli lava ia ‘ua o‘o mai i ona po nei.

10. O sē alofa i lona uso, o lo‘o tumau o ia i le malamalama e leai fo‘i se mea ‘iā te ia e tausuai ai.

11. A o lē ‘ino‘ino i lona uso, o i le pouliuli o ia, o lo‘o savali fo‘i i le pouliuli, e lē iloa fo‘i e ia le mea e alu i ai, auā ‘ua fa‘atauasoina ona mata e le pouliuli.

12. Le fānau e, ‘ou te tusi atu ‘iā te ‘outou, auā ‘ua fa‘amāgaloina a ‘outou agasala ‘ona o lona suafa.

13. ‘Outou tamā e, ‘ou te tusi atu ‘iā te ‘outou, auā ‘ua ‘outou iloa o ia o lo‘o i ai talu le amataga. Taulele‘a e, ‘ou te tusi atu ‘iā te ‘outou, auā ‘ua ‘outou manumālō i lē o lo‘o leaga. Tamaiti e, ‘ou te tusi atu ‘iā te ‘outou, auā ‘ua ‘outou iloa le Tamā.

14. ‘Outou tamā e, ‘ua ‘ou tusi atu ‘iā te ‘outou, auā ‘ua ‘outou iloa o ia o lo‘o i ai talu le amataga. Taulele‘a e, ‘ua ‘ou tusi atu ‘iā te ‘outou, auā e malolosi ‘outou, o lo‘o tumau fo‘i ‘iā te ‘outou le afioga a le Atua, ‘ua ‘outou manumālō fo‘i i lē o lo‘o leaga.

15. ‘Aua tou te manana‘o i le lalolagi, po o mea o i ai i le lalolagi. Pe ‘āfai e mana‘o se tasi i le lalolagi, e lē o ‘iā te ia le alofa i le Tamā.

16. Auā o mea uma lava o i le lalolagi, o le tu‘inanau o le tino, ma le tu‘inanau o mata, ma le fa‘alialia o lenei olaga, e lē mai le Tamā ia, ‘ae mai le lalolagi.

17. O le a mavae atu fo‘i le lalolagi, ‘atoa ma lona tu‘inanau, a o le fai le finagalo o le Atua, e tumau lea e fa‘avavau.

O Fili o Keriso

18. Le fānau e, o ona aso nei e gata ai, fa‘apei ‘ona ‘outou fa‘alogo ai fo‘i o lo‘o sau le anetikeriso, o lo‘o i ai nei fo‘i anetikeriso e to‘atele; o le mea lea ‘ua tatou iloa ai ‘ua latalata mai le i‘uga.

19. Na latou ō ‘ese ‘iā i tatou, tatou te lē ‘aufa‘atasi mā i latou auā ‘ana fa‘apea e tatou te ‘aufa‘atasi mā i latou, po ‘ua latou tumau ma i tatou; a ‘ua ō ‘ese i latou ‘ina ‘ia fa‘aalia ai, tatou te lē fa‘atasi mā i latou uma.

20. A o ‘outou ‘ua fa‘au‘uina ‘outou e le Pa‘ia, ma ‘ua iloa e ‘outou uma.

21. ‘Ua ‘ou le tusi atu ‘iā te ‘outou, auā ‘ua ‘outou lē iloa le ‘upu moni, ‘ae peita‘i ‘ua ‘outou iloa lava, ‘ua iloa e ‘outou e leai se tala pepelo mai le ‘upu moni.

22. O ai ‘ea le tagata pepelo, pe ‘āfai e lē o lē ‘ua fa‘afiti, ‘ua fa‘apea: E lē o le Keriso o Iesu? O le anetikeriso lava lea o lē ‘ua fa‘afiti i le Tamā ‘atoa ma le Alo.

23. ‘Ai sē fa‘afiti i le Alo, e lē o ‘iā te ia le Tamā; a o lē na te talia le Alo, ‘ua ‘iā te ia fo‘i le Tamā.

24. O lenei, o le mea ‘ua ‘outou fa‘alogologo i ai talu le amataga, ‘ia tumau lava lea ‘iā te ‘outou; ‘āfai e tumau ‘iā te ‘outou le mea ‘ua ‘outou fa‘alogologo i ai talu le amataga, ‘ona ‘outou tumau ai lea i le Alo ‘atoa ma le Tamā.

25. O le mea fo‘i lenei na folafola mai e ia ‘iā te i tatou, o le ola e fa‘avavau.

26. ‘Ua ‘ou tusi atu ia mea ‘iā te ‘outou, i ē o lo‘o tau fa‘asesē atu ‘iā te ‘outou.

27. A o ‘outou ‘ua fa‘au‘uina ‘outou e ia, e tumau lea ‘iā te ‘outou, e lē aogā fo‘i ‘ona a‘oa‘oina ‘outou e se tasi. Auā ‘ua lava ma totoe le fa‘au‘uga lea na te a‘oa‘oina mea uma ‘iā te ‘outou auā na te a‘oa‘o atu le moni a lē o le pepelo, o le mea lea ‘ia ‘outou tumau lava ‘iā te ia.

28. O lenei fo‘i, le fānau e, ‘ia ‘outou tumau ‘iā te ia, ‘ina ‘ia maua ai e i tatou le loto tele pe ā fa‘aali mai o ia, ‘ia lē fa‘amāina fo‘i i tatou i ona luma i lona afio mai.

29. ‘Āfai ‘ua ‘outou iloa o le amiotonu ia, ‘ua ‘outou iloa ai o i latou uma o ē fai le amiotonu ‘ua fānau mai i latou ‘iā te ia.