1. ‘Ua filifili Tavita ma ali‘i o ta‘ito‘aafe ma ta‘ito‘aselau ma ta‘ita‘i sili uma.
2. ‘Ua fai atu fo‘i Tavita i le fa‘apotopotoga uma o Isaraelu, “‘Āfai e tatau ‘iā te ‘outou na ma ‘ua finagalo i ai le ALI‘I lo tatou Atua, ‘ia tatou feausoloina atu o tatou uso o totoe i nu‘u uma o Isaraelu, o le ‘au ositaulaga ma sa Levī fa‘atasi ma i latou ‘iā latou ‘a‘ai ma tuāfanua, ‘ia fa‘apotopoto mai ‘iā te i tatou;
3. ‘ia tatou ‘aumaia le ‘atola‘au a lo tatou Atua ‘iā te i tatou; auā na tatou le sā‘ili atu i ai i ona po o Saulo.”
4. ‘Ona tali mai ai lea o le fa‘apotopotoga uma: ‘Ia tatou faia o lea; auā sa lelei lea mea i le manatu o le nu‘u uma.
5. ‘Ona fa‘apotopotoina lea e Tavita o Isaraelu uma, e āfua mai i Seora i Aikupito e o‘o atu i le mea e ui atu ai i Amato, e ‘aumai ai le ‘atola‘au a le Atua mai Kiriata-iarima.
6. ‘Ua ō atu Tavita ma Isaraelu uma i Paala, o Kiriata-iarima lea, o le ‘a‘ai o Iuta, e ‘aveina a‘e ai nai lea mea o le ‘atola‘au a le Atua, o le ALI‘I, o lē afio i le vā o kerupi, e ona le suafa ‘ua vala‘auina i lea mea.
7. ‘Ua latou ‘ave le ‘atola‘au a le Atua i le fata fa‘ata‘avalevale fou ai le fale o Apinatapa; o Usa ma Aio na la ta‘ita‘iina atu ai le fata fa‘ata‘avalevale.
8. ‘Ua sa‘asa‘a Tavita ma Isaraelu uma i luma o le Atua ma lo latou malosi ‘atoa ma latou fai pesega, ‘ua ta kitara ma napeli ma topa ma sumepalo ma ili pū.
9. ‘Ua o‘o i latou i le mea e soli ai saito a Kitonu, ‘ona tago atu lea o Usa o lona lima e tāofi ai i le ‘atola‘au, auā ‘ua taupa‘ū povi.
10. ‘Ona tupu ai lea o le to‘asā o le ALI‘I ‘iā Usa, ‘ona fasia lea o ia, auā ‘ua tago atu lona lima i le ‘atola‘au. ‘Ua oti ai o ia i lea mea i luma o le Atua.
11. ‘Ua tigā Tavita ‘ina ‘ua lipi Usa i le ALI‘I; ‘ona ia fa‘aigoaina ai lea o lea mea, O Faresausa, ‘ua o‘o i nei ona po.