12. Тогда разумеша, яко не рече хранитися от кваса хлебнаго, но от учения фарисейска и саддукейска.
13. Пришед же Иисус во страны кесарии филипповы, вопрошаше ученики своя, глаголя: кого мя глаголют человецы быти, Сына Человеческаго?
14. Они же реша: ови убо иоанна крестителя, инии же илию, друзии же иеремию или единаго от пророк.
15. глагола им (Иисус): вы же кого мя глаголете быти?
16. Отвещав же симон петр рече: ты еси Христос, Сын Бога живаго.
17. И отвещав Иисус рече ему: блажен еси, симоне, вар иона, яко плоть и кровь не яви тебе, но Отец мой, иже на небесех:
18. и аз же тебе глаголю, яко ты еси петр, и на сем камени созижду церковь мою, и врата адова не одолеют ей: