17. и нося крест свой, изыде на глаголемое лобное место, еже глаголется еврейски голгофа,
18. идеже пропяша его и с ним ина два сюду и сюду, посреде же Иисуса.
19. Написа же и титла пилат и положи на кресте. Бе же написано: Иисус назорянин, Царь иудейский.
20. Сего же титла мнози чтоша от иудей, яко близ бе место града, идеже пропяша Иисуса: и бе написано еврейски, гречески, римски.
21. Глаголаху убо пилату архиерее иудейстии: не пиши: Царь иудейский: но яко сам рече: Царь есмь иудейский.
22. Отвеща пилат: еже писах, писах.