26. Ангел же Господень рече к филиппу, глаголя: востани и иди на полудне, на путь сходящий от Иерусалима в газу: и той есть пуст.
27. И востав пойде: и се, муж мурин, евнух силен кандакии царицы муринския, иже бе над всеми сокровищи ея, иже прииде поклонитися во Иерусалим:
28. бе же возвращаяся, и седя на колеснице своей, чтяше пророка исаию.
29. Рече же Дух к филиппу: приступи и прилепися колеснице сей.
30. Притек же филипп услыша его чтуща пророка исаию и рече: убо разумееши ли, яже чтеши?
31. Он же рече: како убо могу (разумети), аще не кто наставит мя? умоли же филиппа, да возшед сядет с ним.