24. От иудей пять краты четыредесять разве единыя приях:
25. трищи палицами биен бых, единою каменьми наметан бых, трикраты корабль опровержеся со мною: нощь и день во глубине сотворих:
26. в путных шествиих множицею: беды в реках, беды от разбойник, беды от сродник, беды от язык, беды во градех, беды в пустыни, беды в мори, беды во лжебратии:
27. в труде и подвизе, во бдениих множицею, во алчбе и жажди, в пощениих многащи, в зиме и наготе.
28. Кроме внешних, нападение еже по вся дни, и попечение всех Церквей.
29. Кто изнемогает, и не изнемогаю? Кто соблазняется, и аз не разжизаюся?
30. Аще хвалитися ми подобает, о немощи моей похвалюся.
31. Бог и Отец Господа нашего Иисуса Христа весть, сый благословен во веки, яко не лгу.
32. В дамасце языческий князь арефы царя стрежаше дамаск град, яти мя хотя: и оконцем в кошнице свешен бых по стене, и избегох из руку его.