16. Сего ради от веры, да по благодати, во еже быти известну обетованию всему семени, не точию сущему от закона, но и сущему от веры авраамовы, иже есть отец всем нам,
17. якоже есть писано: яко отца многим языком положих тя, прямо Богу, емуже верова, животворящему мертвыя и нарицающу не сущая яко сущая.
18. Иже паче упования во упование верова, во еже быти ему отцу многим языком, по реченному: тако будет семя твое.
19. И не изнемог верою, ни усмотри своея плоти уже умерщвленныя, столетен негде сый, и мертвости ложесн сарриных:
20. во обетовании же Божии не усумнеся неверованием, но возможе верою, дав славу Богови
21. и известен быв, яко, еже обеща, силен есть и сотворити.
22. Темже и вменися ему в правду.