14. Тэр түүнд нэг ч үг хэлсэнгүйд захирагч ихэд гайхжээ.
15. Захирагч баяраар ард олны хүсэлтээр нэг хоригдлыг сулладаг заншилтай байв.
16. Тэр үед тэд Бараб гэгч зард гарсан хоригдлыг хорьсон байлаа.
17. Тэгээд ард олныг цуглах үед Пилат тэдэнд—Та нар хэнийг суллуулахыг надаас хүсэж байна? Барабыг уу, эсвэл Христ гэгдэх Есүсийг үү? гэлээ.
18. Учир нь Түүнийг тэд атаархсандаа барьж өгснийг тэр мэдэж байлаа.
19. Пилатыг шүүгчийн суудалд сууж байх үед эхнэр нь түүнд—Тэр зөвт Хүнд юу ч бүү хий. Би урьд шөнө зүүдэндээ Түүнээс болж ихэд шаналав гэж хэлүүлжээ.
20. Харин ахлах тахилч нар болоод ахлагчид олон түмнийг Барабын төлөө гуйж, харин Есүсийг хөнөөлгөхийг ятгасан байлаа.
21. Захирагч тэдэнд—Энэ хоёрын хэнийг нь суллуулмаар байна? гэхэд тэд—Барабыг гэцгээлээ.
22. Тэгтэл Пилат—Тэгвэл Христ гэгдэх Есүсийг би яах болж байна? гэсэнд тэд бүгд л—Түүнийг цовдол гэцгээв.
23. Пилат—Яагаад, Тэр ямар муу юм үйлдсэн юм бэ? гэж асуусанд харин тэд бүгд—Түүнийг цовдол гэж улам чанга хашхирч байлаа.
24. Пилат энэ нь яавч нэмэргүй, харин ч бүр үймээн самуун дэгдэж эхлэхийг хараад, ус авч, хурсан олны өмнө гараа угаан—Би энэ Хүний цусанд буруугүй. Өөрсдөө мэдтүгэй гэжээ.
25. Тэгтэл бүх хүмүүс—Түүний цус бидний болон бидний үр хүүхдүүдийн дээр байг гэцгээв.
26. Тэгээд тэр Барабыг тэдэнд суллан, Есүсийг ташуурдсаны дараа цовдлуулахаар болжээ.
27. Тэгэхэд захирагчийн цэргүүд Есүсийг ордонд авчирч Ромын бүтэн ангийг цуглуулж Түүнийг тойруулав.
28. Тэд Түүнийг нүцгэлээд час улаан нөмрөг нөмөргөж,
29. үүргэнээр титэм сүлжсэний дараа толгой дээр нь тавьж, баруун гарт нь хулс атгуулжээ. Тэд Түүний өмнө сөгдөж,—Иудейчүүдийн Хаанд мэндчилье хэмээн дооглон,
30. Түүн уруу нулимж, хулсыг нь аваад толгой уруу нь цохилоо.
31. Тэд Есүсийг дооглосны дараа Түүнээс нөмрөгийг нь тайлж хувцсыг нь өмсгөв. Тэгээд Түүнийг цовдлохоор авч явлаа.