11. Толгойг нь царан дээр авчирч охинд өгсөнд тэр эхдээ аваачиж өгөв.
12. Иоханы шавь нар ирээд биеийг нь аван оршуулаад, явж Есүст мэдэгдэв.
13. Есүс үүнийг сонсоод тэндээс гарч завиар зэлүүд газар уруу ганцаараа явжээ. Хурсан олон сонсоод, хотоос гарч Түүнийг явганаар дагалаа.
14. Эрэг дээр гарахдаа Есүс асар олон хүн байхыг хараад тэднийг ихэд өрөвдөн, өвчтөнүүдийг нь эдгээв.
15. Орой болох үед шавь нар нь Түүн дээр ирж,—Энэ газар зэлүүд мөн цаг хэдийн талийжээ. Хурсан олныг тараан явуулаач! Тэгвэл тэд гацаанууд уруу явж, өөрсдөдөө хоол хүнс худалдаж авах болно шүү дээ гэцгээв.
16. Харин Есүс тэдэнд—Тэд явах хэрэггүй. Та нар тэдэнд идэх юм өг гэхэд,
17. тэд Түүнд—Бидэнд ердөө л таван талх, хоёрхон загас байна гэсэнд—
18. Нааш нь аваад ир гэж Тэр хэлэв.
19. Есүс хурсан олонд зүлгэн дээр суухыг тушаагаад таван талх, хоёр загасыг авч, тэнгэр өөд ширтэж, хүнсийг ерөөгөөд талхаа хувааж шавь нартаа өгөв. Шавь нар нь хурсан олонд өгөхөд
20. тэд бүгд идэж, цаджээ. Тэгээд тэд үлдэгдэл өвдөл цөвдлийг нь цуглуулахад арван хоёр сагс дүүрэв.
21. Тэнд эмэгтэйчүүд, хүүхдүүдээс гадна таван мянга орчим эрчүүд байж идсэн ажээ.
22. Есүс хурсан олныг явуулах зуураа даруй шавь нараа завинд нь албадан суулгаж, Өөрийнхөө түрүүнд тэднийг нөгөө эрэг уруу явуулав.
23. Хурсан олныг явуулсны дараа Тэр ганцаараа залбирахаар ууланд гарчээ. Орой болоход Тэр тэнд ганцаараа байв.
24. Харин завь хэдийн эргээс олон бээр холдсон байв. Салхи өөдөөс нь салхилж байсан тул давалгаанд түрэгдэн байлаа.
25. Шөнийн дөрөвдүгээр манааны үед Тэр нууран дээгүүр алхан тэднийг зүглэн ирж явав.
26. Нууран дээгүүр алхаж яваа Түүнийг хараад шавь нар нь сандарч,—Энэ чинь хий үзэгдэл байна гээд айснаасаа болж хашхиралдав.
27. Харин тэр даруй Есүс тэдэнд—Зоригтой бай. Би байна. Бүү ай гэжээ.
28. Петр Түүнд—Эзэн, хэрэв Та мөн юм бол, усан дээгүүр алхаж Өөр уруу тань ирэхийг надад тушаагаач гэхэд
29. Тэр—Ир гэлээ. Петр завинаасаа гарч, усан дээгүүр алхлан Есүс уруу явав.
30. Харин Петр салхи хараад, айн, живж эхлэв. Тэгээд—Эзэн, намайг авраач гэж орилоход нь,