1. А кога излегуваше од храмот, еден од учениците Негови Му рече: „Учителе, гледај какви камења и какви градби!“
2. Исус, пак, му одговори и рече: „Ги гледаш ли овие големи градби? Ниту камен на камен нема да остане овде, што не ќе биде урнат!“
3. А кога седеше на Маслиновата Гора, спроти храмот, Го прашаа насамо Петар, Јаков, Јован и Андреј:
4. „Кажи ни, кога ќе биде тоа и кој е знакот, кога ќе се сврши сето тоа?“
5. Исус, одговарајќи им почна да зборува: „Чувајте се да не ве прелаже некој!
6. Зашто мнозина ќе дојдат во Мое име, говорејќи дека сум Јас; и ќе прелажат мнозина.
7. А кога ќе чуете за војни и гласови за војни, не плашете се; зашто сето тоа треба да се случи; но тоа сѐ уште не е крајот.
8. Бидејќи ќе се дигне народ против народ, и царство против царство; а на некои места ќе има и земјотреси и глад и метежи. Тоа е почетокот на страдањата.
9. Но вие чувајте се, зашто ќе ве предаваат на судови; и по синагогите ќе ве бијат, и пред управници и пред цареви ќе бидете изведувани заради Мене, за сведоштво пред нив.
10. И кај сите народи најнапред треба да се проповеда Евангелието.
11. А кога, пак, ќе ве поведат, за да ве предадат, не грижете се однапред што ќе говорите, ниту размислувајте; туку она, што ќе ви се даде во тој час, тоа кажете го; не сте вие што ќе зборувате, туку Светиот Дух.
12. И брат брата ќе предаде на смрт, и татко чедо, и ќе се дигнат децата против родителите, и ќе ги предадат на смрт.
13. Ќе бидете намразени од сите заради Моето име; кој ќе претрпи до крај, тој ќе биде спасен.“
14. „А кога ќе видите дека гнасниот пустошник, за кого говори пророк Даниил, стои каде што не треба – кој чита, нека разбере – тогаш, оние што се во Јудеја, нека бегаат по планините;
15. и кој е на покривот, да не слегува во куќата, ниту да влегува да земе нешто од куќата своја;
16. и кој е на нива, да не се враќа за да ја земе облеката своја!
17. Но тешко на бремените и на оние што дојат во тие дни!
18. Туку молете се, бегањето ваше да не биде зиме!
19. Зашто во тие дни ќе има неволја, каква немало досега од почетокот на светов, што го создаде Бог, а и нема да има.
20. И ако Господ не ги скрати тие дни, тогаш никој не би се спасил; но заради избраните, кои ги избра Тој, ги скрати дните.
21. Тогаш, ако ви каже некој: ‚Еве, овде е Христос‘, или ‚Ене, таму е‘, не верувајте!
22. Зашто, ќе се појават лажни христоси и лажни пророци, и ќе покажат знаци и чуда, за да ги прелажат, ако е можно, и избраните.
23. Но вие – чувајте се! Ете, сѐ однапред ви кажав!
24. Во тие дни, по неволјите, сонцето ќе се помрачи и месечината нема да ја дава својата светлина,
25. и ѕвездите ќе паѓаат од небото, и силите, што се на небото, ќе се разнишаат.
26. И тогаш ќе Го видат Синот Човечки, како иде на облаци со голема сила и слава.
27. Тогаш Тој ќе ги испрати ангелите Свои и ќе ги собере Своите избрани од четирите ветра, од крајот на земјата до крајот на небото.
28. Научете ја параболата од смоквата: кога нејзините гранки се подмладуваат и пуштаат лисја, знаете дека е близу летото.
29. Па така и вие, кога ќе видите дека сето тоа се случува, знајте дека е близу, пред врата!
30. Вистина ви велам: нема да помине овој род, додека сето тоа не се случи.
31. Небото и земјата ќе минат, но зборовите Мои нема да минат!“
32. „А за тој ден и час никој не знае, ниту ангелите небесни, ниту Синот, а само Отецот.
33. Внимавајте, бидете будни и молете се, зашто не знаете кога ќе биде часот.
34. Како човек, кој заминувајќи, ја остава куќата своја и им дава власт на слугите свои, секому своја работа, и на вратарот му заповеда да биде буден.
35. Бидете будни, зашто не знаете кога ќе дојде домаќинот на куќата, приквечер ли, или на полноќ, или петлите кога ќе пропеат, или наутро,
36. па да не дојде ненадејно и да ве затече како спиете.
37. Што ви зборувам вам, им го зборувам на сите: Бидете будни!“