2. На свадбата беа поканети и Исус и Неговите ученици.
3. А кога приврши виното, Му рече мајка Му на Исуса: „Немаат вино.“
4. Исус ѝ рече: „Што бараш од Мене, жено? Уште не дошол Мојот час.“
5. Но мајка Му Негова им рече на слугите: „Сѐ што ќе ви рече, направете!“
6. А таму имаше шест камени садови за вода, поставени според јудејскиот обичај за очистување, што собираа по две до три мери.
7. Исус им рече: „Наполнете ги садовите со вода!“ И тие ги наполнија до горе.
8. Па им кажа: „Нацрпете сега и однесете му на старосватот!“ И му однесоа.
9. И кога вкуси старосватот од виното, што беше станало од вода – а тој не знаеше од каде е, но слугите, што ја беа донеле водата, знаеја – старосватот го повика младоженецот,
10. и му рече: „Секој човек најнапред го изнесува доброто вино, а кога ќе се поднапијат, тогаш полошото; но ти си го чувал доброто вино до сега.“
11. Со ова направи Исус почеток на чудата во Кана Галилејска и ја покажа славата Своја; и учениците Негови поверуваа во Него.
12. Потоа слезе во Капернаум, Тој и мајка Му, браќата Негови и учениците Негови; и таму остана неколку дена.
13. Се приближуваше Пасха јудејска и Исус се искачи во Ерусалим;
14. и ги затече во храмот оние што продаваа волови, овци и гулаби, и менувачите на пари – како седат.
15. И откако направи камшик од врвци, ги избрка од храмот сите, и овците и воловите; а на менувачите им ги растури парите и ги испреврте масите,
16. па им рече на оние што продаваа гулаби: „Носете го тоа одовде, и од домот на Мојот Отец немојте да правите дом за трговија!“
17. Учениците, пак, Негови тогаш се сетија дека е напишано: „Ревноста за Твојот дом Ме изеде.“
18. А Јудејците, пак, одговорија и Му рекоа: „Со каков знак ќе ни докажеш дека го правиш тоа?“
19. Исус им одговори и рече: „Урнете го овој храм и за три дни ќе го подигнам.“