4. Еден од учениците Негови, Јуда Симонов Искариотски, кој сакаше да Го предаде, рече:
5. „Зошто не се продаде ова миро за триста денарии, и тоа да се раздадеше на сиромаси?“
6. Ова тој го рече не дека се грижеше за сиромасите, туку зашто беше крадец. Тој го чуваше ковчежето и крадеше од она што пуштаа во него.
7. А Исус рече: „Оставете ја! Таа го запази тоа за денот на Мојот погреб;
8. зашто сиромасите ги имате секогаш покрај себе, а Мене Ме немате секогаш.“
9. Мнозина од Јудејците разбраа дека Исус е таму, па дојдоа не само заради Исус, туку да го видат и Лазар, кого Тој го воскресна од мртвите.