22. Dia fahagagana tany amin'ny tanin'i Hama sy zava-mahatahotra teo amin'ny Ranomasina Mena.
23. Ary nikasa handringana azy Izy, Raha tsy Mosesy voafidiny no nandroso hijoro tamin'ny banga teo anatrehany hampiala ny fahatezerany mba tsy handringanany azy.
24. Ary nanamavo ny tany mahafinaritra ireo Sady tsy mba nino ny teniny,
25. Fa nimonomonona tany an-dainy Ka tsy nihaino ny feon'i Jehovah.
26. Dia nanandratra ny tànany taminy Izy, Fa hampiampatrampatra azy any an-efitra
27. Ary ny taranany kosa any amin'ny jentilisa, Ary hampihahakahaka azy any amin'ny tany maro Izy.
28. Nikambana tamin'i Bala-peora ireo ka nihinana ny fanatitra ho an'ny maty,
29. Dia nampahatezitra an'i Jehovah tamin'ny nataony, Ka dia namely azy tampoka ny areti-mandringana.
30. Fa nitsangana nandroso Finehasa ka nanao fitsarana; Dia nitsahatra ny areti-mandringana.
31. Ary nisaina ho fahamarinany izany Hatramin'ny taranaka fara mandimby mandrakizay.
32. Nampahatezitra an'i Jehovah teo anilan'ny ranon'i Meriba ireo, Ka nisy nanjo an'i Mosesy noho ny nataon'ireo;
33. Fa niodina tamin'ny Fanahin'i Jehovah ireo, ka dia nihoa-bava Mosesy.
34. Tsy naringany ny firenena Izay nasain'i Jehovah naringany;
35. Fa nifangaro tamin'ny jentilisa izy Ka nianatra ny fanaony,
36. Dia nanompo ny sampiny izy, Ka dia nody fandrika ho azy izany.
37. Namono ny zananilahy sy ny zananivavy ho fanatitra ho an'ny demonia ireo;
38. Eny, nandatsaka rà marina izy, Dia ny ran'ny zananilahy sy ny zananivavy, Izay novonoiny ho fanatitra ho an'ny sampin'i Kanana; Ka dia nametaveta ny tany tamin'ny rà izy.