11. et cessare faciam omne gaudium ejus,solemnitatem ejus, neomeniam ejus, sabbatum ejus,et omnia festa tempora ejus.
12. Et corrumpam vineam ejus, et ficum ejus,de quibus dixit : Mercedes hæ meæ sunt,quas dederunt mihi amatores mei ;et ponam eam in saltum,et comedet eam bestia agri.
13. Et visitabo super eam dies Baalim,quibus accendebat incensum,et ornabatur in aure sua, et monili suo.Et ibat post amatores suos,et mei obliviscebatur, dicit Dominus.
14. Propter hoc ecce ego lactabo eam,et ducam eam in solitudinem,et loquar ad cor ejus.
15. Et dabo ei vinitores ejus ex eodem loco,et vallem Achor, ad aperiendam spem ;et canet ibi juxta dies juventutis suæ,et juxta dies ascensionis suæ de terra Ægypti.