1. In diebus illis surrexit Mathathias filius Joannis filii Simeonis, sacerdos ex filiis Joarib, ab Jerusalem, et consedit in monte Modin :
2. et habebat filios quinque, Joannem, qui cognominabatur Gaddis :
3. et Simonem, qui cognominabatur Thasi :
4. et Judam, qui vocabatur Machabæus :
5. et Eleazarum, qui cognominabatur Abaron : et Jonathan, qui cognominabatur Apphus :
6. hi viderunt mala, quæ fiebant in populo Juda, et in Jerusalem.
7. Et dixit Mathathias : Væ mihi ! ut quid natus sum videre contritionem populi mei, et contritionem civitatis sanctæ, et sedere illic, cum datur in manibus inimicorum ?