1. Jacobus, Dei et Domini nostri Jesu Christi servus, duodecim tribubus, quæ sunt in dispersione, salutem.
2. Omne gaudium existimate fratres mei, cum in tentationes varias incideritis :
3. scientes quod probatio fidei vestræ patientiam operatur.
4. Patientia autem opus perfectum habet : ut sitis perfecti et integri in nullo deficientes.
5. Si quis autem vestrum indiget sapientia, postulet a Deo, qui dat omnibus affluenter, et non improperat : et dabitur ei.