1. Maêke! peê carai guasu mbaererecojá, peyajeó ja peguajú, pe pende pyambyasy vaerâjá reje pejasa asy jaguâme.
2. Umi penerâcâteŷjá ituyúpá jina ja pende ao itînguaámbá jina:
3. pende oro ja pende plata javêmbá jina ja upe javêngue oicone imombeujára ramo pendejegui, ja ocarúne pende roo reje tatáicha. Peê pembyatŷne rae penerâcâteŷjárâ iñongatupyrâicha co âva ára pajápe.
4. Che jae peême umi ombaapojára rembiapo repŷ rângue ombyaty vaecue peême pende coga ácue peñemojâcâteŷjá peina peê, coa oguerosapucai pende coty coty ja umi ombaapo jaré sapucai ojupityma Ñandeyára apysápe upe yvapegua ruvicha guasúva.
5. Co ybyari peê peicove rae tecoita rejeve, ja peñembotieŷ peicovo, peñemoateî pendepyape caruete gui: pe oyeyuca jeta jaguâ ára jiâguima.
6. Pemoî vaí nerae ja peyuca yepe pe cuimbae jecoitepeguape: jae voi na nembojováiri yepe ndeve.
7. Peêcuera, che reŷicuera, peropuaca perokîrîrî oi yeby peve ñanendive Ñandeyára. Nde rejechaipa pe oñemitŷjara ojaârôjá ipôrâ jaguâ icóga. Jae ojaârô kîrîrîjáme icoga rejejápe pe oky tenonde ramo guârâ oñemitŷ rire, ja are rire oky ramo guârâ yeby.
8. Peê upeicha avei peropuaca kîrîrîjáme peñembopya guasu jâtâ pe ára Ñandeyára oi yeby jaguâ ñanedive: jiâguima voi.
9. Ani peñomoî vaí oyupecuera, anichene jaguâ peê peñemoî vaí. ¿Ndapejechaipa ñande ruvicha jaetéva oñemboŷ jina pe okême voi.
10. Oyejechaucá jaguâ, che reyicuera, mbaeichapa yaropuaca vaerâ kîrîrîjame yayeyopyjá rupi, pene manduana umi oñemoñeêjara reje oñeê vaecue Ñandeyára rérape.
11. ¿Nda pejechaipa ñande yaejá jeco oryete jague umi oguerokîrîrî vaecue oyeyopy jague rupi? Pejendune rae oñeê ramo ogueropuaca ja oguerokîrîrî jague pe Job, ja pejechane rae mbaeichapa Ñandeyára ipajápe oguereco pôrâ ichupe. Ñandeyára voi ipya kŷrŷieté voi ja oiporo poriajuverecova.
12. Opaichavevo, che reyicuera, ani pemoañete pende peyeva Ñandeyára rérape pejenôivo yvaga rérape terâ yby rérape, terâ oimeraêva térape yepe. Pene Neí ta Neí nte ja pende Tové ta Tovénte, anichene jaguâ peñemoî vaí.
13. Oimeramo pende apytepe peteî ojasa asŷva, toñemboe nte jae. Oimeramo joryva jeteaeva jina, aiporamo, topurajei Ñandeyárape.
14. Oimeramô pende apytepe jasŷva jina, tojenôiucá umi ituyáva tûpâopeguape, ja toñemboe jaecuera jiari omoná rire jese ñandy Ñandeyára rérape.
15. Ja pe yeroviajá ñemboe rupi jesâi yebyne pe jasŷva ja Ñandeyára omopuâ yebyne ichupe, ja sapya jae oyapo rire angaipa oyepeáne ichugui iñangaipa.
16. Upeicharamo, peñomombeu pene angaipagui oyupe ja peñomboe oyueje pene resâi jaguâ. Ipuaca voí pe cuimbae jecopegua ñemboe oñeñatôima guive ipya apyte guive.
17. Elias voí cuimbae ñandeichaguante avei, ja jae oyerure rure yeby yeby oñemboejápe oky ŷ jaguâ, ja upeicha ndokyi yby ári mbojapy roŷ ja seis yasŷ peve.
18. Uperire oñemboe yeby ja yvaga omonguŷ, ja pe yby ombojiá yvá ja coga.
19. Che reyicuera, oime ramo peteî peêva opiáva Ñandeyára Ñeê jecopeguágui ja oime ramo ambue omboyeby yebŷva ichupe,
20. toicuaa upeva upe omboyereva peteî angaipavórape pe tape oyeyaby jague gui oipeajá jina upe anga omano jaguâ gui ja oyajoíucájá angaipa atŷra voi.