15. Ja jei ichupe cuera Jesús: ¿Mbaéicha nipo? ¿Icatúpa pe omendatava îrûnguera jasê, oico aya meme jendive cuera pe omendatava? Oune ára oyepea jaguâ ichuguicuera pe omenda ramôva, ja uperamo jaecuera ipya mbyasŷne ocaruŷrejeve.
16. Na ñambobybyri ao pejenguemi pyajúva cu ao ituyáva reje: upeicharamo, pe pejengue ipyajúva osorópá pe ñande ao gui ja ivaívé vaerâ pe osoró jague.
17. Upeicha avei na ñambojŷrúi vino pyajú mbae piré ituyávape; upeicharamo, osoro umi jŷrú mbae piré guigua ja oñejê reí pe vino, ja ocanŷmbá umi jyrúcué. Ñambojyrunte vino pyajú jyrú mbae piré ipyajúvape, ja upeicharamo, opytá pôrâ oñondive oñombuaiŷreje.
18. Uperamo oñeê yavé jina Jae umi mbae ichupecuera, ou peteî mburuvicha ja oñesû Ichupe jeivo: Omano râmôite che rayŷmi. Eyókena, ja emôi ndepo jese ja jae oicove yebyne.
19. Upei catu opuâ Jesús ja ojo japycueri, ja ojo jemimboe cuera avei.
20. Ja sapyaite ou peteî cuña oyapóma doce años jasy jague tuguy guasu gui, ja oñemboyá Japycue guivo, ja opoco iyao rembey reje.
21. Jei nipo racaé ipyápe: Sapya apocómínte ramo iyao reje che resaimane.
22. Upevove oyeré Jesús ja omaê jese ja jei: Nde pya guasunte, Che rayŷ! reyerovia jague nemojesaima: ja upeguive voínte jesâi opytávo pe cuña.
23. Upeyavé ou ôguajêvo Jesús pe mburuvicha rógape ja ojecha ramo umi imbopújá cuerape ja umi jasêvape iyatŷva jicuai,
24. Jae jei ichupecuera: Peyeóinte! Nomanoi co cuñami. Okente jina. Ja jaecuera opucá Jese.
25. Upei catu oñemosêma ramo ocápe umi iyatŷva jicuai pe cotype, Jae oiké ja oipyjy ipo ja upévo opuâ pe cuñami.
26. Ja co jêrâcuâ oñejendú oparupi pe tetâ rupi.
27. Upei catu ojasa pypé Jesús upegui, ojo japycuéri mocoî ojechaŷva osapucaivo ja jeivo: Ore poriajuverecomi oreve, Nde, David Ray!
28. Ja ôguajêma ramo ogape yepe, ou Jendápe umi ojechaŷva, ja Jesús jei ichupecuera: ¿Peroviapa icatu jaguâ ayapo Che âmbae? Jaecuera jei Ichupe: Upeicha, carai!