29. Upeicharamo co nde resá nde acatuápegua oñembotieŷucá ramo ndeve, enojênte, ja emombo ndeyejegui: ipôrâvé jávareje ndeve ocañŷ ndejegui peteî nde rete pejenguemi, aniterei oyeitypá co nde rete añaretâme.
30. Ja nde po ndeacatuápegua oñembotieŷucá ramo ndeve, eikytînte, ja emombo ndeyejegui, ipôrâvé jávareje ndeve ocañŷ ndejegui peteî nderete pejenguemi, aniterei oyeitypá co nde rete añaretâme.
31. Oyee vaecue avei oime ramo opoiséva jembirecogui, tomeê raê ichupe cuatia mburuvichaguiguare oyeí jaguâ jecópe oyuejegui.
32. Che voí jae peême upe opoíva jembirecogui oime ŷ reje oñembotiey jague omboya vaerâ jese, ombuaiucá mendaré ichupe, ja pe omendava pe ipoípyrereje, upeva avei ombuai mendaré.
33. Upeicha avei pejendu neracae oyee jague umi ymaguarepe: Ani reñemboyapú resê pypé neñeêgui. Remeê vaerâ jecópe upe nde reicuameê vaecue Ñandeyárape.
34. Che voí jae peême: Ani mbaevéicharamo jecoŷme rembuayeté reí avave rérape. Ani rembuayeté reí yvaga rérape. Upéva voí Tûpâ Ñandeyára renda oguapyjá.
35. Ani rembuayeté reí co yby rerape. Upéva voí ipy renda. Ani rembuayeté rei Jerusalem rérape, upeva voí pe mburuvicha guasu retâ.
36. Ani rembuayeté rei neâcâ rérape, ndicatui voí remomorotî terâ remojû peteîmi nde áva yepe.
37. Pene ñeê catuke ta cóicha Neí, neí! Tové, tové! ja oime ramo oyuapŷva umivareje jecovaíva rejeguama.
38. Pejendu neracae oyee jague: Tesá tesá recoviá mante vaerâ ja Táî táî recoviá mante vaerâ.