16. Upei catu Jae oporandú ichupecuera: ¿Mbaépa peñejaâ jendive cuera?
17. Upei catu peteîva umi iyatŷva jicuai jei Ichupe: Ore poro mboejára, aru Ndeve co che raŷpe jasŷva mbaepochy iñeêngûva gui,
18. ja mamo oipyjyjápe ichupe oity ichupe ybŷpe, ja iyuru jŷyúi, ja jaîñeê ja iyŷpí oicovo. Ja ayerure curi ne remimboe cuerape oity jaguâ pe mbae vaí ja nda ipuacái jese.
19. Upei catu Jae jei Ichupecuera: Peê catu umi ogueroviaŷva rejeguáva. ¿Aracaépevepa aime vaerâ penendive? ¿Aracaépevépa po rokîrîrîta peême? Perúnte ichupe Cheve coápe.
20. Ja upeicha oguerú ichupe Jendápe. Ja pe mbaepochy ojechama ramo Ichupe, sapyaite oipocápá pe jasŷvape ja jae joa ybype ja oyapayerei ja iyuru jŷyúi.
21. Upei catu Jae oporandú itúvape: ¿Aracaé guivépa oico upeicha? Ja jae jei: Imitâmi guive voi,
22. ja jeta yeby oity ichupe tatape ja ŷpe upeicha avei, oyucá jaguâicha ichupe. Anga catu, icatú ramo, ore poriajuverecomi oreve ja ore pytyvô.
23. Upei catu Jesús jei ichupe: ¿Mbaeicha nipo icatú ramo? Opambae icatúva pe ogueroviávape.
24. Upevove osapucai pe mitâ rú ja jei: Che aroviaité catú. Che pytyvôkena che yeroviaŷjá reje yepe.
25. Upei catu Jesús ojecha ramo iyatŷjá yoa jicuai Jendápe, oyao pe mbaepochŷpe ja jei ichupe: Nde mbaepochy ne ñeêngûva ja nde apysaŷva, Che catu Jae ndeve: Esênte ichugui ja anive reiké ipypé.