1. Uperire Jae oguata oicovo umi tetâ rupi ja umi oga ocara rupigua rupi oñemoñeêvo ja omojerâcuâvo pe Evangelio pe mbae pôrâ ipyajúva pe teco marangatu Tûpâ Ñandeyára rejegua gui. Ja oico Jendive umi doce jemimboe cuera,
2. ja oime avei cuña cuera oñemo jesâi vaecue ipo rupi mbaepochŷ gui, ja mbaasŷ ambuegui, pe Maria jérava avei Magdaléna osê jague siete mbaepochŷ,
3. ja Juana pe Herodes yeroviajá Chusa rembireco, ja Susanna ja cuña cuera ambuecue oyeyocuaiuca vaecue Jesúspe ja jemimboe cuerape imbaeteéva gui voínte.
4. Uperire oñembyaty yoá yoá jeta ybypóra ja ou ouve meme Jendápe umi ambue tetâ gui. Ja Jae oñeê ichupecuera guaujápe, jeivo:
5. <<Osê guaú peteî ñemityjára oñemitŷ jaguâ mbae raŷî ja oñemitŷ ramo ojovo oime joa reí vaecue ichugui pe tape ŷképe, ja oñepyrû ja umi guyra oveveva ou ja joupá.
6. Ja oime guaú joa reí vaecue pe itá jâtâ reje ja jeñoi voí ja voí ipirú najeoi gui.
7. Ja oime joa reí vaecue guaú ñuatî ndŷpe ja umi ñuatî jeñoi oñondive ja ombopytúpá.
8. Ja oime joa réi vaecue yby pôrâ jápe ja jeñoi pôrâ ja jiá pôrâ, oime iñapêsâ cien raŷîva. Upei catu jeipáma ramo umimbae Jae osapucai jeivo: Oime ramo iyapysáva ojendu jaguâ tojendunte!
9. Upei catu umi jemimboe cuera oporandu Ichupe: ¿Mbaépa jeise coa ñeê guaujapegua?
10. Ja Jae jei ichupecuera: Peêmente año iya peicuaa umi mbae ñemí co teco marangatu Tûpâ Ñandeyára rejegua guare, umi ambuecue cuerape iya añeê guaújápente, icatu jaguâ omaê ramo yepe jaecuera ojecha ŷ jaguâ ja ojendu ramo yepe ojechacuaa ŷ jaguâ.
11. Co ñeê guaújápegua jeise coicha: Umi mbae raŷî Tûpâ Ñandeyára Ñeê.
12. Umi tape ŷképeguare, umiva catu umi ojendu vaecue ja ou voí pe mbaepochy ja oipea ipya gui pe Ñeê anichene jaguâ oguerovia oñemojesâi jaguâ jianga.
13. Ja umi itá jâtâ rejeguare umiva catu umi ojendu vaecue ja oguerovia vaecue torŷpape pe Ñeê. Umiva ndajapói gui oguerovia sapyaminte ja oime ramo ipya raâva, upe jaárape opoí.
14. Ja umi joa vaecue umi ñûatîndype, umiva catu umi ojendu vaecue: upeguirire oicove yave icatu oyepyapŷ ja iñanguecói umi imbaererecoja gui ja icatu obya eterei gui co teco ybyariguape, oñembopytúpá ja noñemo tyarôi jecópe.
15. Umi yby pôrâ rejeguare umiva catu umi ojendu vaecue pe Ñeê ja oñongatu ichupe imanduajápe ipya pôrâ ja jecopeguápe ja upeicha oguero puaca ipya rôsâme osê pôrâ meve jecope.
16. Ndipori omyandŷva tataendŷ oyajoi jaguâ ichupe mbayru guŷpe terâ omoi jaguâ jupa guype, omoînte pe tataendy rendape ojecha jaguâ ojesapejá umi oikéva pe cotype.
17. Ndipori mbae oñemí vaecue oyejechacuaa ŷ vaerâ, ja ndipori mbae oyeyajoí vaecue oyecuaauca ŷ vaerâ oñerênojê pype ára sâcâ jápe.
18. Peñeñangarecóke, upeicharamo, mbaeichapa pejendú. Oime ramo oguerecóva, oñemeêve vaerâ ichupe, ja oime ramo oguereco ŷ va, pe oguereco ramo gua baicha oñemboí vaerâ ichugui.
19. Uperamo ou Jendápe isŷ ja umi tybŷra cuera. Ja ndicatui oñemboyá Jendápe oñembyaty jeta eterei gui jicuai.
20. Ja oime omomaranduva Ichupe: Nde sy ja Nde ryby cuera oi ocápe nde rechasevo.
21. Ja Jae jei ichupecuera: ¿Che sy pico ja Che ryby cuera? umiva catu umi ojendúva Tûpâ Ñandeyára Ñeê ja oyapóva jecope.
22. Uperire peteî ára Jae oyupi mbayrupe jemimboe cuera ndive ja jei ichupecuera: Yajasa mandike co ŷ mboypŷri! ja upeicha oyeoi.
23. Ja ojo aya jicuai Jae oké jina. Ja sapyaite oico ára vaí ybytú jâtâ rejeve ja pe mbayru jenyjê moâ ŷ gui ja oi vaí jicuai.
24. Upei catu ôguajê jaecuera Jendápe ja omombaŷ Ichupe jeívo: Caraí, caraí, yajá vaí ñaina! Ja Jae opaŷ ja oyaó pe ybytu ja pe ŷ opupúvape ja okîrîrî voí ja upeicha ára pôrâ yebŷma.
25. Ja Jae jei ichupecuera ¿Môôpa oîme pende yerovia jague? Ja okyjŷyé jaecuera ja ojecharâmô ja jei oyoupecuera: ¿Mávapa cova co ybytúpe ja co ŷpe yepe oyocuai ja iñeêrendú Ichupe?
26. Upegui rire ôguajê umi Gadareno retâme pe oiva Galilea rovai.
27. Upepe ogueyŷ Jae ybype ja ou ojuvâitivo Ichupe peteî cuimbae pe tetâmegua mbaepochy rembitarova: jiaréma voí noñemondevei jague ja ndoicovei jague ógape, oicóvante umi omano vaecue oñeñotŷ jague rupi.
28. Ja ojecha ramo Jesúspe osapucai ja oñesû Jesúspe ja jei osapucaijápe: ¿Mbaépa reipota chejegui, nde Jesús Tûpâ Ñandeyára Tuvichaitevéva Raŷ? Che ayerure ndeve ani che muanguecói cheve.
29. Jae voi oyocuai raé pe mbaepochy vaípe osê jaguâ pe cuimbae gui. Jiaréma voí oguero ñeguajê ichupe pe mbaepochy, ja oñejaâ ramo yepe umi japicha cuera oyoco jaguâ ichupe oyeyocuapŷpé ipó ja ipŷ pe, jae omondojó reínte pe oyeyocuajague ja upegui oñereroñeguajê pe mbaepochy rupi umi ñû reí reje.
30. Ja Jesus oporandu ichupe: ¿Mbaéichapa nde rera? Ja jae jei: Legion (atŷra yae mo ñande): oime voí mbaepochy atŷraetá oike vaecue jeté pypé.
31. Ja oyerure Ichupe ani omondo ichupecuera pe ybyguŷpeté-añaretâme.
32. Upepe sapya oime voí curé atŷra ocaruva jicuai pe itáatŷra ypy rupi. Ja oyerure Iehupe umi mbaepochy Jae omoingue jaguâ ichupecuera jetépe cuera. Ja jae oyapoucá pe jeiva.
33. Upei catu osê umi mbaepochy cuera pe cuimbae gui ja oiké umi curé retepe ja pe curé atŷra oyeity peteî itá guasu yvaté ári gui pe ŷpeve ja joŷguŷpá.
34. Upei catu umi curé rerecua ojecha ramo pe oyeju vaecue oñeguajê ja omomarandú upe tetâmeguape ja pe ñûrupiguape avei.
35. Ja upei catu osê jicuai ojecha jaguâ pe oyeju vaecue ja ojuââimba Jesú rendape ja oyuju pe cuimbae osê jague umi mbaepochy cuera oguapy Jesú py renondepe ja oñemondé ja iñâcâguapŷma jecope.
36. Ja okyjŷyé jicuai, ja umi jechajaré omombeúpá mbaéichapa oñemo jesâi raé pe cuimbae pe mbaepochy rembitarova vaecue.
37. Upei catu opa umi ybypóra Gadarenepegua ja iyerecuerejegua oyerure Ichupe oyeí jaguâ jendágui, okyjŷyé tuvicha eterei. Upeareje Jae oyupi pe mbayrupe ja oyei upegui.
38. Pe cuimbae voi pe mbaepochy osê jague, oyerure Ichupe oico jaguâ reje Jendive. Ja Jae omondo ichupe jeivo:
39. Terejó yebynte nde rogape, ja emombeupá umi mbaeguasu Tûpâ Ñandeyára oyapo vaecue ndeve. Upeareje jae ojo ja omojerâcuâ opa pe tetâ rupi umi mbae tuvicha oyapo vaecue ichupe Jesús.
40. Upei catu oyebŷvo Jesús, umi ybypóra oguerojorŷ Ichupe, opavave jaecuera omaña voí jicuai Jesé.
41. Uperamo ou peteî carai jérava Jairo pe tûpâo ñangarecojára ja oyeity Jesús py renondepe oñesûvo Ichupe, ja oyeruré Ichupe ôguajê jaguâ jogape.
42. Oime oguereco itayŷra peteîmi doce añova, ja upeva omanombotama jina. Ja uperamo oguatavo oicovo Jae, oyoapá jiari umi jicuai vaecue Japycueri.
43. Ja peteî cuña oyapoma doce años jasy jague mbaasy jyguepegua gui, ja omeêmbama opa oguerecómimíva umi ipôjânôjarépe ja ndipóri raé ipuaca vaecue imbaasy reje omojesâi jaguâ ichupe.
44. Upéva ôguajê Japycue guivo ja opocó iyao rembeŷ reje ja upevové jŷpá pe tuguy imbaasŷrejeguare.
45. Upei catu jei Jesús: ¿Avápa co opocóva Chereje? Ja opavavé jei ndoicuaaijá. Upei catu Pedro ja umi oiva jendive jei: Ore Caraí, oime co iyatŷetéva Nde yopŷpá oyoápá.
46. Ja jei yeby Jesús: Oime raé peteîva opoco vaecue Chereje. Che ajechacuaa voínte osêjá Chejegui Che puacácué gui.
47. Upei catu pe cuña, ojecha ramo Jae ndojechaguíri jague ichupe, oryrŷipá ouvo ja oñesû Ichupe ja omombeupá opava renondepe maerâpa opoco raé Jese, ja mbaéichapa jesâi voí yeby raé opytá.
48. Upei catu jei Jesús: Che rayŷ reyerovia guinte reñemo jesâimba. Terejo nde pyaguapŷ jaguâme.
49. Uperamo oñeê pype gueteri Jae, oime ou peteî pe tûpâo ruvicha rogapeguáva jeivo ichupe: Oime omanóma nde rayŷ! Anive, upeicha ramo, reyocuai co carai poromboejárape.
50. Ja ojendú pype upea, Jesús jei: Ani rekyjŷyé! Eyeroviánte ja jesâi yeby vaerâ.
51. Upeicha ôguajê jogape ja Jae nomoinguei ondive avavépe, pe Pedro ja Juan ja Santiagope año mante ja pe mitâ cuña rú ja sŷ.
52. Upepe oime voí oyajeóva yoa ja oyepytianûpâva yoa pya mbyasŷ gui, ja Jae jei: Ani peyajeó, nomanoi jina, okénte!
53. Upeichape opuca Jesé, oicuaa pypé voi jaecuera omanómajá jae.
54. Ja Jae oipyjy ipo ja oñeê jâtâ: Mitâ cuña, epuânte!
55. Upevove ipytûjê yeby ja opuâ voí ja Jae jei ichupecuera omongarú jaguâ ichupe.
56. Ja ojecharâmô pe túva ja isŷ, ja Jae jei ichupecuera anichene jaguâ omombeu avavépe pe oyeyapo vaecue.