19. Ja opa umi ybypóra oñejaâ opoco Jese, osêjareje Ichugui mbae ipuacáva omojesâi vaerâ opávape.
20. Uperire Jae omaê ja oyesarecó umi jemimboe cuera reje ja jei ichupecuera: Pende reco marangatu vaerâ peêcuera pende poriaju pene tyreŷva, pene mbaerâ voínte pe teco marangatu yvapegua rejegua.
21. Pende reco marangatu vaerâ peêcuera coanga pene ñembyajyiva, peê voi peñemo jyvâtâ vaerâ. Pende reco marangatu vaerâ peêcuera coanga peyajeóva, peê voi pende rorŷ vaerâ.
22. Pende reco marangatú vaerâ umi carai cuera pene ñamotareŷ reí ramo ja pende peá reí ramo iyapytegui cuera ja pene momârâ reí ramo, ja omboí rei ramo pende réra ivaívaicha co Caraí Raŷ rejegua járeje peê.
23. Pende rorŷ peê upe jaára ja peyerokŷ pende rorŷ gui, tuvicha voínte oñembo jecovia vaerâ peême yvagape. Upeicha voí oyapo vaecue ituva cuera ypycue umi oñemoñeêjára cuera ymaguarépe.
24. Angai peê mbaererecojá cuera! Coanga voínte peê perecoma pene angapyjy jaguâ.
25. Angai peêcuera pene ryvâtâmbava jina! Peê pene ñembyajŷi vaerâ. Angai peê pende rorŷva coanga! Pembuasy ja peroyajeó vaerâ.
26. Angai peê oñeê pôrâ ramo pendejegui opa umi ybypóra cuera! Upeicha voí oyapo vaecue itúva cuera umi jaûvôjára ymaguarepe.
27. Peême voí Cherendúvape peina Cheve taémi peême: Pejayjú umi nda yaeívape pendereje, ja peyapo pôrâ umi pene ñamotareŷvape.
28. Pejovasá umi oñeê vaíva pendereje pe, ja peñemboe umi pene momârâva reje.
29. Ja oime ramo nembotáva nde rova ykepe emboyere ichupe pe iyováiva. Ja oime ramo omboíva ndejegui nde ao ndeajoyava ani ne râcâteŷ ne aomimi reje avei.
30. Ja oime ramo oyeruréva ndeve emeênte ichupe. Ja oime ramo oipyjŷva ndejegui nembaéva ani reyerure oñembo jecovia jaguâ reje.
31. Ja peipota jaicha peê oyapo jaguâ peême umi caraí cuera, upeicha avei peyapo peê ichupecuera peteicha.
32. Pejayjú ramo pende rayjúvape, ¿mbaépa oime oñembo jecovia vaerâ peême? Umi iñangaipáva yepe avei ojayjú umi ojayjúvape ichupecuera.
33. Ja peyapo pôrâ ramo umi oyapo pôrâvape peême, ¿mbaépa oimene oñembojecovia vaerâ peême? Umi iñangaipáva oyapo nte avei upeicha.
34. Ja upeicha avei peiporucá ramo umi pejaârô jaguâ peiporú yeby, ¿mbaépa oimene oñembo jecovia vaerâ peême? Umi iñangaipavóra avei oiporú umi angaipavórape oñembo jecovia yeby jaguâ ichupecuera peteîcha.
35. Pejayjúnte, upeicharamo, umi pene ñamotareŷvape, ja peyapo pôrâ ja peiporuca ichupecuera máramo pepoívo pende yerovíajague gui, ja oimene oñembo jecovia vaerâ tuvicha peême, ja peê peñemoingo vaerâ upe Yvateitevéva ray cuera ramo. Upéva voí imbae pôrâva umi tecove otîŷvape yepe ja umi jeco vaívape yepe.
36. Peiporoporiajuvereco peê avei, upeicharamo, upe pende Ru oiporo poriajuverecova jaicha.
37. Ani pecaguaí avave reje, ja upeicharamo, pende reje avei ndiporichene ocaguai vaerâ. Ani pemoî vaí reí avavépe, ja upeicharamo ndiporichene pene moî vaí vaerâ peême. Pejeya reí peê, ja peême avei oyejeya reíne.
38. Pemeê peê ja upeicharamo oñemeêne peême, pene mbayru ipôrâvape oyeyopŷvape oñemonguévape ja oñejêmba reívape omeêne peême pende ao ryguépe: upe mbayrunte voí peê pejaâ jague upévapŷ oñejaa yeby vaerâ peême.
39. Upei catu oñeê yeby ichupecuera guaujápe jeivo: ¿Icatúpa pe jesapysoŷva oisambyjy pe jesapysoŷva ambuepe?