9. Onemondŷi ja tuvicha okyjŷyé jae ja opa iñîrûnguera avei oi vaecue jendive jeta eterei jague gui ôguenojê umi pirá,
10. ja upeicha avei oñemondŷi Simon îrûnguera Jacobo ja Juan, Zebedeo raŷ. Ja Jesús jei Simonpe: Ani rekyjŷyé, anga guive reico vaerâ cuimbae pyjyjára ramo.
11. Upei catu ogueru ramo ybype imbayru jaecuera ojeyapá imbae ja ojo japycueri jeseguarâ.
12. Uperire pe ára ambuepe oi pype jina peteî tetâme oime upepe peteî cuimbae iyaípáva pe mbaasy Lepra gui ja ojechama ramo Jesúspe oñesû Ichupe ovapŷvo ja oyerure Ichupe jeivo: Che caraí, reipota ramo, Nde puaca voí che mopôti jaguâ.
13. Upei catu Jae oipyso ipo ja opoco jese ja jei: Che aipota! Ta nepôtí! Ja upevove ocañŷmba ichugui pe Lepra iyaíjá,
14. ja jei Jae ichupe ani jaguâ omombeu avavepe: Terejónte, jei, eyejechauca pe paípe ja eicuameê upe Moises omeêucá jagueicha reñemopôtí jague reje oyecuaauca jaguâ opavavépe.
15. Upeicharamo yepe, oñemuasâive meme ojovo jêrâcuâ Ichugui, ja oñembyatŷ jeta ybypóra ojendu jaguâ Ichupe ja oñemojesâiucá jaguâ imbaasy gui cuera.
16. Ja Jae voí oyepea ichugui cuera pe ñû oyeicoŷjape oñemboe jaguâ.
17. Ja peteî árape Jae oporomboe jina ja oi upepe oguapy jicuai umi fariseo ja umi escriva iñarandu reíva ou vaecue opa umi tetâ Galilea ja Judea pegua gui, ja Jerusalem gui avei. Ja pe Ñandeyára puacacué oi Jendive omojesâi jaguâ ichupecuera.
18. Ja sapya ou cuimbae cuera oguerúva jupápe peteî cuimbae iyapávape ja ojeca jicuai omoingue jaguâ ichupe omoî jaguâ Jesús renondepe,
19. ja ndoyujui pypé omoingue jaguâ ichupe umi iyatŷva gui jicuai, oyupi pe oga ári, ja ombocuá ja ogueroyŷ jupá rejeve iyapytépecuera Jesús renondepe.
20. Ja Jae ojecha pypé jaecuera oyeroviájá Jesé jei ichupe: Cuimbae, ne angaipa oyepeapáma ndejegui.
21. Upei catu umi escriva iñarandureíva ja umi fariseo jaecueranteséva oñypyrú oñomongueta oñondive: ¿Avápa cóva, jei, oñeê vaíva Tûpâ Ñandeyára reje? ¿Avápa icatu vaerâ oipea angaipa? Tûpâ Ñandeyára año mante.
22. Upei catu Jesús, ojechacuaa pypé pe jiâva ichupecuera jina, jei: ¿Mbaépa peimoa pende pyapype?