15. Upeicharamo yepe, oñemuasâive meme ojovo jêrâcuâ Ichugui, ja oñembyatŷ jeta ybypóra ojendu jaguâ Ichupe ja oñemojesâiucá jaguâ imbaasy gui cuera.
16. Ja Jae voí oyepea ichugui cuera pe ñû oyeicoŷjape oñemboe jaguâ.
17. Ja peteî árape Jae oporomboe jina ja oi upepe oguapy jicuai umi fariseo ja umi escriva iñarandu reíva ou vaecue opa umi tetâ Galilea ja Judea pegua gui, ja Jerusalem gui avei. Ja pe Ñandeyára puacacué oi Jendive omojesâi jaguâ ichupecuera.
18. Ja sapya ou cuimbae cuera oguerúva jupápe peteî cuimbae iyapávape ja ojeca jicuai omoingue jaguâ ichupe omoî jaguâ Jesús renondepe,
19. ja ndoyujui pypé omoingue jaguâ ichupe umi iyatŷva gui jicuai, oyupi pe oga ári, ja ombocuá ja ogueroyŷ jupá rejeve iyapytépecuera Jesús renondepe.
20. Ja Jae ojecha pypé jaecuera oyeroviájá Jesé jei ichupe: Cuimbae, ne angaipa oyepeapáma ndejegui.
21. Upei catu umi escriva iñarandureíva ja umi fariseo jaecueranteséva oñypyrú oñomongueta oñondive: ¿Avápa cóva, jei, oñeê vaíva Tûpâ Ñandeyára reje? ¿Avápa icatu vaerâ oipea angaipa? Tûpâ Ñandeyára año mante.
22. Upei catu Jesús, ojechacuaa pypé pe jiâva ichupecuera jina, jei: ¿Mbaépa peimoa pende pyapype?
23. ¿Mbaépa icatuvéva, yaé ramo: Ne angaipa oyepeapama ndejegui, terâpa yaéramo: Epuâ ja terejó.
24. Anga peicuaa jaguâ peê co Caraí Raŷ ipuacajá co ybyari oipea jaguâ angaipa (upévo jei pe iyapávape) Che jae ndeve: Epuânte ejupi nde rupá ja terejó nde rogape.
25. Upevove opuâ jesápe cuera ja ojupi pe oñenó jague jina ja ojo jogape ombuetévo Tûpâ Ñandeyárape.
26. Ja tuvicha oñemondŷi opa umi ambuecue cuera ja upegui ombuete Tûpâ Ñandeyárape. Upeicha ramo yepe tuvicha okyjŷyé jicuai ja jei: Coanga yajecha mbae guasu iyerovia ŷ jarâ.
27. Uperire Jae osê ja oguata oicovo ja ojecha peteî mbaerepy monoôjarape jérava Levi (Mateo) oguapŷ jina pe mburuvicha rogape, ja Jae jei ichupe: Eyo Che rapycueri Che rejeguarâ.